Përditësim, 17 nëntor, ora 09:45: Kryeministri Edi Rama, në një intervistë nga aeroporti "Nënë Tereza" u ndal te ngjarja tronditëse në qytetin e Fierit, ku një i mitur, 8 vjeç, u gjet i vrarë dhe i mbuluar me baltë në oborrin e fqinjit.

“Pritet me padurim nga të gjithë verdikti më ekstrem i drejtësisë mbi barbarin, i cili falë reagimit të menjëhershëm dhe identifikimit dhe kapjes së shpejtë nga Policia, gjendet sot prapa hekurave. Kjo është një nga ato ngjarje që të lënë pa fjalë. Duke shqyrtuar imtësisht gjatë mbrëmjes së djeshme të gjithë rrjedhën e ngjarjes dhe profilin e autorit, mbetet shija e tmerrshme e asaj që ka ndodhur dhe siç e thashë domosdoshmëria për të reaguar menjëherë në nivelin e drejtësisë”, tha kryeministri.

Artikulli i mëparshëm (16 nëntor, ora 22:00): Ngjarja e rëndë në Fier: 38-vjeçari rrëmbeu dhe vrau një fëmijë 8 vjeç

Një ngjarje e rëndë ka ndodhur në qytetin e Fierit, saktësisht në fshatin Grecall, ku një 38-vjeçar rrëmbeu, vrau dhe groposi në oborrin e shtëpisë një djalë 8 vjeç.

Euronews Albania raporton se e ëma e viktimës e kishte raportuar fëmijën të humbur, pasi nuk qe kthyer në banesë. Trupi u gjet i mbuluar me baltë, në ambientet e banesës së Klodian Çalamënit, 38 vjeç.

Sipas gazetarëve në terren, Çalamëni ishte komshi me viktimën dhe dyshohet se e ka vrarë dhe më pas e ka mbuluar me baltë në një cep të oborrit të tij. “E mora në shtëpi. E vrava dhe e groposa me baltë në oborr,” shkruan BalkanWeb për deklaratën e 38-vjeçarit.

BalkanWeb raporton se fill pas këtij episodi të rëndë, ai ka dalë në rrugë dhe ka pyetur disa herë familjarët e viktimës nëse e kishin gjetur djalin. Kjo gjë mendohet se ka bërë që përkohësisht të humbin gjurmët.

Sipas Euronews, autori ka shfaqur shenja dhune edhe në të shkuarën, kryesisht kundrejt fëmijëve. Sipas të dhënave paraprake dyshohet se Klodian Çalamëni në moshën 29 vjeçare ka rrëmbyer një 16-vjeçare.