Çfarë është Astroworld? Kush është Travis Scott? Të tjera detaje janë zbuluar për incidentin vdekjeprurës.
Të paktën tetë persona ndërruan jetë dhe shumë të tjerë u plagosën pasi turma nisi të lëvizë dhe njerëzit të “shtypnin” njëri-tjetrit teksa reperi Travis Scott ishte në skenë në Festivalin Astroworld në Houston të premten mbrëma.
Incidenti ndodhi kur turma u zhvendos drejt skenës, duke shtypur ata në pjesën e përparme që nuk ishin në gjendje të shpëtonin, tha shefi lokal i zjarrfikësve Sam Peña për CNN të shtunën në mëngjes. Kjo shkaktoi panik dhe situata u përkeqësua dhe mbingarkoi personelin e sigurisë atje, tha ai.
Kush është Travis Scott?
Travis Scott është reper, këngëtar dhe producent diskografik 30-vjeçar nga Houston, Teksas. Ai është më i njohur për albumin e vitit 2018 "Astroworld". Travis është artist i njohur dhe më parë ka bashkëpunuar me reperë të tjerë të shquar duke përfshirë Drake, Young Thug dhe të tjerë. Ai ka një fëmijë me Kylie Jenner dhe janë në pritje të një tjetër fëmije.
Çfarë është Astroworld?
Astroworld është një festival muzikor i themeluar nga Scott dhe i mbajtur në Houston. Festivali u lançua për herë të parë nga Scott në vitin 2018, në të njëjtin vit kur u publikua albumi me të njëjtin emër. Pse Houston? Houston është qyteti i vendlindjes së Scott dhe është vendi ku Six Flags Astroworld - një park argëtimi - ishte dikur. Parku u mbyll në vitin 2005 dhe Scott e titulloi albumin e tij të tretë sipas parkut.
A ka pasur probleme me Astroworld më parë?
Tre persona u shkelën dhe u shtruan në spital në nëntor të vitit 2019 teksa mijëra njerëz nxituan për të hyrë në festival. Ata u dërguan në spital me lëndime në këmbë dhe eventi vijoi sipas planit.
Çfarë ka thënë policia për incidentin tragjik?
Hetimi i policisë lokale është ende në vazhdim dhe po hetohet se çfarë e shkaktoi lëvizjen e turmës dhe çfarë i pengoi njerëzit të mund t'i shpëtonin asaj situate.
A ishte e përfshirë droga?
Shefi i policisë Troy Finner adresoi raportet se njerëzit po drogoheshin pa pëlqimin e tyre në një konferencë për shtyp të shtunën. "Një nga dëshmitë ishte se një individ po i injektonte drogë njerëzve të tjerë. Ne kemi një raport të një oficeri sigurie, sipas personelit mjekësor, se ai ishte jashtë dhe u shtri për të frenuar ose kapur një qytetar dhe ndjeu një shpim në qafë,” tha Finner përmes CBS. "Kur ai u ekzaminua, ra pa ndjenja. Ai u zgjua dhe stafi mjekësor vuri re një shpim që ishte i ngjashëm me një shpim ku injektohet diçka.”
Të tjera informacione
Departamentet e vrasjeve dhe narkotikëve të Departamentit të Policisë në Houston janë përfshirë në hetim, por hetimi nuk po trajtohet si krim, tha policia. Si pasojë e kaosit të krijuar, të paktën 25 njerëz u dërguan në spital për trajtim. Pesë prej tyre janë nën moshën 18 vjeç.
Mosha e viktimave është nga 14 deri në 27 vjeç; mosha e një personi tjetër të vdekur mbetet e panjohur.
Sarai Sierra, e cila shkoi në festival për të festuar ditëlindjen e saj, tha se pa shumë njerëz që nuk mund të merrnin frymë pasi Scott u shfaq në skenë.
"Me të vërtetë mendova se nëse do të rrëzohesha do të kishte qenë fundi im. Kalova të paktën 15 minuta vetëm duke u shtyrë për shkak sepse njerëzit ishin 'tërbuar'," tha Sierra për CNN. “Më dukej sikur po mbyteshim në një pishinë të mbushur me njerëz,” tha ajo.
"Gjendja po vazhdonte për më shumë se dy orë," tha Nick Johnson, një tjetër i pranishëm. " Po bëhej gjithnjë e më keq. Thjesht nuk mund të marrësh frymë, thjesht ndihesh sikur ka një batanije të rëndë mbi ty."
“Sapo njerëzit shtyheshin drejt skenës, frymëmarrja u bë më sfiduese,” shpjegoi një i pranishëm tjetër, Angel Rodriguez.
Burimet: CNN, US Magazine, Guardian, CBS
