Eshtrat e gjetura në një park në Florida të mërkurën i përkasin Brian Laundrie, të fejuarit të blogeres së vrarë Gabby Petito, thotë FBI.

Eshtrat e Brian, i cili rezultonte i zhdukur për më shumë se një muaj, u identikuan duke përdorur të dhënat dentare. Brian, i cili ishte një person me interes në vdekjen e Gabby Petito-s, u kthye në Florida muajin e kaluar nga një udhëtim i përbashkët rrugor pa partneren e tij. Trupi i saj u gjet më vonë në Wyoming, ku çifti kishte qenë duke udhëtuar.

Një avokat që përfaqëson prindërit e Brian Laundrie publikoi një deklaratë, duke thënë: "Chris dhe Roberta Laundrie janë informuar se eshtrat e gjetura janë vërtet të Brian. Ne nuk kemi asnjë koment të mëtejshëm për momentin dhe kërkojmë që ju të respektoni privatësinë e familjes Laundrie në këtë moment."

Gjatë kontrollit u gjetën edhe sende të tjera, duke përfshirë një çantë shpine dhe një fletore të cilat i përkisnin Brian-it.

Në një konferencë të shkurtër shtypi të enjten, sherifi i qarkut Lee County, Carmine Marceno, vlerësoi zyrtarët për punën në "kushte të vështira" në park. Ai e përshkroi zonën ku u gjend trupi si të mbushur me gjarpërinj dhe aligatorë.

Brian Laundrie nuk u akuzua për krime në lidhje me vrasjen e Gabby Petito. Megjithatë, FBI lëshoi një urdhër arresti dhe e akuzoi për mashtrim pasi kishte përdorur e saj të debitit pas vdekjes së saj.

Në fillim të tetorit, FBI konfirmoi se Petito ndërroi jetë nga mbytja. Koha e vdekjes së saj vlerësohet të ketë qenë tre deri në katër javë para se të gjendej trupi.

Policia ka zbuluar se përpara se të zhdukej, Gabby dërgoi mesazhe të shumta me tekst dhe pati shumë biseda me nënën përmes telefonit celular gjatë udhëtimit, ku vihej re se kishte gjithnjë e më shumë tension mes çiftit.

Autoritetet e Utah-s publikuan në media një regjistrim të një telefonate në 911 më 12 gusht, data kur disa policë ndaluan çiftin. "Ne kaluam me makinë dhe zotëria po godiste vajzën", i thotë telefonuesi një operatori të 911-s. "Pastaj ne u ndalëm. Ata vrapuan. Ai vazhdoi ta godiste, hipi në makinë dhe ata u larguan."