Sepse paguhej shumë ndoshta? Oh, prit. Të mos tregohemi kaq të cekët.

Ka arsye tjetër po thua? Ndoshta.

Le ta dëgjojmë. Indra Nooyi ishte një nga CEO-t më të paguar në botë gjatë punës së saj në PepsiCo.

Ah, pra dolëm te fjala ime. Paguhet shumë. Po duro!!! Në një intervistë për New York Times, ish-drejtoresha ekzekutive u duk sikur mburrej që “kurrë, kurrë, kurrë nuk ka kërkuar rritje rroge”. Madje personat që qëndronin “poshtë” saj në hierarkinë e punës i kërkonin vazhdimisht që të kërkonte rritje rroge, pasi kompensimi i tyre ishte i lidhur me të sajin.

Dhe? Oh, jo. Ajo nuk pranoi. “Më duket e tmerrshme,” tha 65-vjeçarja. “Nuk mund ta imagjinoj të punoj për dikë dhe të them që paga ime nuk është e mjaftueshme.”

Sa e kishte rrogën? Ajo fitoi 31 milionë dollarë gjatë vitit të fundit si CEO i PepsiCo.

Pse dreqin i duhej rritje rroge?! Pak a shumë, paguhej 650 herë më shumë se punonjësi mesatar i kompanisë.

Shumë i kuptueshëm vendimi për të mos kërkuar rritje rroge. Ndër të tjera, tha se ka jetuar në të njëjtën shtëpi për më shumë se 30 vjet.

Oh, goxha e përulur. Po, vetëm se ka blerë të gjitha pronat përreth në mënyrë që askush të mos ndërtojë një rezidencë afër tyre.

Ah, qartë. Nejse pse duhet ta dinim ne këtë. Po pse jo?! Plus është një intervistë disi e çuditshme e një prej njerëzve më të fuqishëm në botë.

Pse? Indra Nooyi është renditur vazhdimisht në mesin e 100 grave më të fuqishme në botë. Në 2014-n u rendit në vendin e 13 në listën e Forbes për 100 gratë më të fuqishme në botë dhe e dyta në listën e Fortune për vitin 2015. Ndërsa në vitin 2017, u rendit e dyta në listën e Forbes për 19 gratë më të fuqishme në biznes.

Edhe një pyetje. Sa është pasuria e saj? Sipas Forbes, 290 milionë dollarë.

Shumë për të qeshur se si të vetmit njerëz që thonë se paratë nuk janë të rëndësishme, janë ata që i kanë me bollëk.