Një grup punonjësish të tanishëm dhe të mëparshëm në Blue Origin, kompania e fluturimeve hapësinore në pronësi të themeluesit të Amazon, Jeff Bezos, ka akuzuar biznesin se funksionon përmes një mjedisi pune që është i “mbushur me seksizëm” dhe preferon “shpejtësinë marramendëse” në vend të sigurisë.
Një letër e hapur e shkruar nga Alexandra Abrams, ish-shefja e komunikimit të punonjësve në Blue Origin dhe 20 punonjës të tjerë aktualë dhe ish-punonjës, thotë se kultura e kompanisë "pasqyron më të keqen e botës në të cilën jetojmë tani" dhe duhet të ndryshojë.
Letra, e botuar në forumin Lioness, ku ekspozohen informacione rreth aktivitetit të një kompanie që konsiderohen të paligjshme, të pasigurta, mashtrim ose abuzim, thotë: “Boshllëqet gjinore të fuqisë punëtore janë të zakonshme në industrinë e hapësirës, por në Blue Origin ato gjithashtu shfaqen me një vulë të veçantë seksizmi. Udhëheqës të lartë të shumtë dihet se sillen vazhdimisht në mënyrë të papërshtatshme me gratë."
Letra pretendon se një figurë e lartë në organizatë është raportuar disa herë për ngacmim seksual dhe se punonjëset e reja gra janë paralajmëruar që të qëndrojnë larg nga një ekzekutiv tjetër, i cili dyshohet se kishte ngacmuar një kolege. Letra shton se fuqia punëtore është "kryesisht meshkuj" dhe "jashtëzakonisht e bardhë".
Një zëdhënës i Blue Origin tha: “Blue Origin nuk toleron diskriminimin ose ngacmimin e çdo lloji. Ne ofrojmë rrugë të shumta për punonjësit, përfshirë një linjë telefonike anonime 24/7 dhe do të hetojmë menjëherë çdo pretendim të ri për sjellje të keqe.”
Punonjësit gjithashtu pohojnë se drejtuesit e lartë në kompani - përfshirë Bezos, një nga njerëzit më të pasur në histori - e shtynë stafin të merret me më shumë ngarkesë pune pa rritur buxhetin ose numrin e personelit në dispozicion. Kjo ndikoi te siguria e raketës New Shepard.
Në letër shkruhet se Blue Origin i ka thënë përparësi shpejtësisë së raketës New Shepard – me të cilën fluturoi Jeff Bezos – dhe jo sigurisë. Theksohet se shqetësimet për sigurinë u ngritën nga gratë, por u “u mbyllën përfundimisht”.
Sipas mendimit të një inxhinieri anonim që bashkë-firmosi letrën e hapur, "Blue Origin ka qenë me fat që asgjë nuk ka ndodhur deri më tani".
Pavarësisht pasurisë së Bezos, punonjësit gjithashtu pohuan se kërkesat për buxhete më të mëdha janë refuzuar shpesh. Punonjësve u thuhet shpesh që "të jenë të kujdesshëm me paratë e Jeff", “të mos kërkojnë më shumë" dhe "të jenë mirënjohës", thuhet në letër.
Nuk është hera e parë që një kompani e Bezos përflitet për mjedis toksik dhe shfrytëzues pune. Në mars të këtij viti, u raportua ndër të tjera se Amazon “detyron punonjësit të urinojnë në shishe plastike”.
Burimet: Guardian, Euronews
