Një gjykatë në Los Anxhelos pezulloi të atin e e Britney Spears nga kujdestaria përmes së cilës ai ka kontrolluar jetën e saj për 13 vjet, duke shënuar një fitore të madhe për këngëtaren, e cila ka kohë që kundërshton.

Në një seancë gjyqësore të mërkurën, gjyqtarja Brenda Penny urdhëroi që Jamie Spears të pezullohej si kujdestar efektiv menjëherë. "Situata aktuale është e papërballueshme," tha Penny pasi dëgjoi argumente kundërshtuese nga të dyja palët. "Situata pasqyron një mjedis toksik që kërkon pezullimin e James Spears."

Ajo caktoi një seancë dëgjimore më 12 nëntor për të diskutuar përfundimin e plotë të kujdestarisë, të cilën duket se të gjitha palët e mbështesin.

Mathew Rosengart, avokati i Britney Spears, kërkoi që babai i saj të hiqet menjëherë para se të ndërmerreshin veprime të tjera, duke thënë se ishte e nevojshme për mirëqenien e këngëtares. Britney nuk ishte e pranishme në seancën e së mërkurës.

Vendimi vjen tre muaj pasi ylli i popit u lut publikisht që babai i saj të hiqet, duke pretenduar se ai kishte qenë abuziv. Ajo pretendoi se ai dhe të tjerët kontrollonin detajet intime të jetës personale dhe e kishin detyruar të punonte kundër vullnetit të saj.

Një dokumentar i kohëve të fundit i New York Times pohoi gjithashtu se Jamie Spears kishte punësuar një firmë sigurie që të vëzhgonte fshehurazi telefonin e vajzës, duke regjistruar bisedat në dhomën e gjumit.

Në seancën e së mërkurës, avokati i Britney-t tha se heqja e Jamie-t ishte hapi i parë drejt përfundimit të një "makthi" duke shtuar se ajo "është abuzuar nga ky njeri jo vetëm në dekadën e fundit, por që nga fëmijëria e saj".

Jodi Montgomery, një kujdestare e licencuar, tani mbikëqyr kujdesin shëndetësor të Spears dhe ajo gjithashtu ka sinjalizuar mbështetjen për t'i dhënë fund kujdestarisë. Një llogaritar publik i certifikuar do të marrë përsipër menaxhimin e përkohshëm të pasurisë.

Fansat e Britney-t udhëtuan nga të gjitha vendet për të mbështetur Spears në LA të mërkurën, ku shumë protestues bllokuan rrugën jashtë gjykatës për tubimin e tyre.

Burimet: Guardian, CNN