Një shtëpi e Ishujve Kanarie – arkipelag autonim spanjoll në brigjet e Afrikës veriperëndimore – i shpëtoi rrjedhës së lavës së vullkanit në La Palma. Fotot tregojnë vendbanimin e paprekur, në mesin e një peizazhi të zi, tërësisht të djegur nga shpërthimi vullkanik.
Njerëzit në rrjete sociale e cilësuan atë si “shtëpia e mrekullisë”. Pronarët e shtëpisë, një çift danez në pension të cilët nuk gjendeshin në ishull, thanë se ishin “të lehtësuar që ajo po qëndronte ende atje”, sipas Ada Monnikendam, e cila e ndërtoi shtëpinë bashkë me bashkëshortin e saj.
"Ne të gjithë filluam të qajmë si të çmendur kur u thashë [pronarëve] se shtëpia e tyre e dashur ishte e paprekur," tha Monnikendam për El Mundo. Shtëpia gjendet në El Paraíso, ku më shumë se gjysma e shtëpive dhe shkollave lokale janë shkatërruar.
Çifti zgjodhi ishullin La Palma posaçërisht për shkak të peizazhit vullkanik, tha Monnikendam për El Mundo. Ajo tha se është "e trishtë që të dish se shtëpia është atje vetëm, pa qenë në gjendje të kujdesesh për të".
Drejtoresha e Institutit National Geographic në Ishujt Kanarie, Maria Jose Blanco, tha në një konferencë shtypi se “aktiviteti sizmik në ishullin La Palma tani ishte i ulët”.
Në disa vende, rrjedha e lavës u ngrit deri në 15 metra. Për momentin, ajo ka mbuluar 166 hektarë dhe ka shkatërruar 350 shtëpi. Pasiguria ka lënë shumë banorë në anën perëndimore të ishullit. Shkencëtarët thonë se rrjedhat e lavës mund të zgjasin për javë ose muaj.
Asnjë dëmtim serioz ose vdekje nuk është raportuar për shpërthimin e vullkanit, por rreth 15% e të korrave të bananeve, vendimtare për ekonominë e ishullit, mund të jenë në rrezik, duke rrezikuar mijëra vende pune.
Shpërthimi i fundit në La Palma ndodhi në vitin 1971.
Burimet: Associated Press, El Mundo, Reuters
