8 ndeshje, 16 sportistë të huaj dhe shqiptarë, të ftuar specialë – këto janë fjalët kyçe të eventit që do të drithërojë sheshin “Skënderbej” këtë fundjavë, më 12 shtator. Me siguri që ju ka rastisur të shihni ndonjë postim që promovon Albulena Fight Night. Nëse keni qenë të paqartë, jeni në artikullin e duhur.

Për herë të parë në sheshin “Skënderbej”, dy kampionë në disiplinën dhe kulturën Muay Thai do të përballen me njëri-tjetrin: Ervis Bici, 4 herë kampion Italie dhe dy herë kampion Europe vs Abdul Kassimi, kampion bote në vitin 2016. Përpos tyre, të tjerë sportistë do të ndeshen në dispilinën e veçantë.

Por para se të kalojmë te të ftuarit, disa fjalë për Muay Thai. Muay Thai, i cili njihet edhe si “boksi Thai”, është një art dhe sport luftarak që përdor goditje me këmbë së bashku me goditje dhe teknika të ndryshme. Si disiplinë, njihet edhe si “arti i tetë gjymtyrëve” pasi karakterizohet nga përdorimi i kombinuar i grushtave, bërrylave, gjunjëve dhe këmbëve.

“Ky event synon të sjellë dhe të prezantojë te shqiptarët dëshirën dhe pasionin për disiplinën dhe kulturën Muay Thai. Për ta, Muay Thai është më shumë se sport ose karrierë, është një kulturë dhe stil jetese,” zbuluan organizatorët për Anabel.

Muzika dhe humori nuk do të mungojnë. Dafina Zeqiri, Noizy, Bes Kallaku, Meriton Mjekiqi etj., janë disa prej të ftuarve.

Shtojmë se të gjitha biletat e shitura do të shkojnë për bamirësi. Ç’po prisni ende? Bëhuni pjesë e adrenalinës. Si? Blini biletën në hyrje të eventit ose kontakto në numrin në +355 69 232 3569 për bileta pre-sale.

Shënojeni në kalendar: e diel, 12 shtator – ora 17:00!