Gruaja e Michael Schumacher, Corinna, zbuloi se ish-kampioni botëror i Formula 1 është ende duke luftuar për t’u shëruar nga dëmtimi i trurit si pasojë e aksidentit me ski, por mbetet "këtu, por ndryshe", në një dokumentar të Netflix që do të transmetohet javën e ardhshme.
"Të gjithëve na mungon Michael, por Michael është këtu, ndryshe, por këtu," thotë Corinna. "Ai ende më tregon se sa i fortë është çdo ditë."
Përditësimet mbi shëndetin e ish-yllit të Ferrarit kanë qenë të rralla që nga aksidenti në vitin 2013, veçanërisht nga familja.
“Ne jemi bashkë. Jetojmë së bashku në shtëpi. Bëjmë terapi. Ne bëjmë gjithçka që mundemi për ta bërë Michael-in më mirë dhe për t'u siguruar që ai është rehat. Dhe thjesht ta bëjmë atë të ndiejë familjen tonë, lidhjen tonë. Dhe pa marrë parasysh çfarë, unë do të bëj gjithçka që mundem. Ne të gjithë do ta bëjmë. Po përpiqemi të vazhdojmë si familje, ashtu siç i pëlqente Michael-it dhe i pëlqen ende. Po vazhdojmë jetën.”
Schumacher tani është 52 vjeç, ndërsa djali i tij Mick, i cili ishte 14 vjeç në kohën e aksidentit, tani garon për Haas në F1. Corinna u martua me Schumacher në 1995 dhe ata gjithashtu kanë një vajzë, Gina, por gjithmonë kanë preferuar privatësinë. Ish-kampioni ka qenë nën kujdes intensiv në shtëpinë e tyre në Gjenevë, Zvicër.
"Ne gjithmonë i kishim kaluar garat e tij në mënyrë të sigurt. Kjo është arsyeja pse isha e sigurt se ai kishte disa engjëj mbrojtës që po kujdeseshin për të. Nuk e di nëse është një lloj muri mbrojtës që e mendon vetë ose është kështu sepse je në njëfarë mënyre naive, por thjesht nuk më ka shkuar në mendje se diçka mund t'i ndodhë Michael-it,” thotë Corinna.
"Unë kurrë nuk e fajësova Perëndinë pse ndodhi. Ishte [aksident], thjesht fat i keq, i gjithë fati i keq që dikush mund të ketë ndonjëherë në jetën e tij," shprehet ajo.
"'Schumacher' përmban intervista të rralla dhe pamje arkivë të pabotuara më parë dhe gjurmon një portret shumë të ndjeshëm dhe kritik të shtatë herë kampionit të botës. Ky është i vetmi film i mbështetur nga familja e tij," shkruan Netflix.
Dokumentari do të publikohet më 15 shtator.
