Aktori Michael K. Williams, i njohur për rolin e tij si Omar Little në serialin “The Wire”, është ndarë nga jeta në moshën 54 -vjeçare.

Duke konfirmuar vdekjen për Hollywood Reporter, përfaqësuesi i Williams tha se ishte "thellësisht i trishtuar që familja njoftoi vdekjen e aktorit të nominuar për Emmy, Michael Kenneth Williams. Ata kërkojnë privatësinë tuaj teksa janë të hidhëruar për këtë humbje të pakapërcyeshme. "

Përfaqësuesi nuk përmendi shkaqet e vdekjes, por Page Six raporton se dyshohet që shkak ka qenë mbidoza.

Williams, i cili besohet se u gjet i vdekur në shtëpinë e tij në New York, ishte i njohur edhe për rolin e Albert "Chalky" White në serialin “Boardwalk Empire” nga viti 2010 deri në 2014. Ai u nominua për Emmy për rolin e Montrose Freeman në serialin “Lovecraft Country”. Aktori i ndjerë u shfaq në disa filma duke përfshirë “Inherent Vice” dhe “12 Years a Slave”.

Përveç “Lovecraft Country”, Williams u nominua tre herë për Emmy Primetime për punën e tij në serialin e HBO “The Night Of”, filmin televiziv “Bessie” dhe miniserialin “When They See Us”.

Roli i tij si Omar Little në “The Wire”, i cili u transmetua nga viti 2002 deri në 2008, e bëri të famshëm. Williams mishëroi një personazh gay që grabiste, i cili nuk ishte parë ndonjëherë në televizion dhe tërhoqi vëmendjen asokohe të presidentit Obama, i cili tha se nuk i pëlqen tipat si Omar në jetën reale, por ai “është personazhi i tij i preferuar”.

David Simon, krijuesi i “The Wire”, tha në Twitter se ishte “shumë i trishtuar tani për të thënë gjithçka që duhej thënë. Michael ishte një njeri i shkëlqyer dhe një talent i rrallë dhe në udhëtimin tonë së bashku ai gjithmonë meritonte fjalët më të mira. Dhe sot ato fjalë nuk vijnë.”