Tenori i njohur Rame Lahaj u ngjit dje në skenën e koncertit “Rame & Friends” në sheshin “Skënderbej” në Prishtinë dhe emocionoi të pranishmit me performancën e tij, ndonëse këta të fundit nuk e dinin se dy orë më parë, tenori kish humbur të ëmën.

“Ju kërkoj falje që duhet ta mbyll më herët. As një e treta e koncertit nuk ishte, sepse dy orë para koncertit ka ndërruar jetë personi më i dashur për mua, nëna. Por nuk desha ta anuloj [koncertin],” u shpreh ai.

Ndarja nga jeta e nënës së tij në moshën 77-vjeçare ishte një lajm i papritur për njerëzit e pranishëm në koncert, të cilët vlerësojnë forcën e jashtëzakonshme të tenorit “për të mbajtur premtimin”.

“Ngushëllime dhe njëkohësisht faleminderit që përkundër dhimbjes së madhe, zgjodhe t’i këndosh vendit,” shkruan dikush. “Bravo ty dje për forcën mbinjerëzore për të majtur premtimet,” lexohet në një tjetër koment. “Dje na shokove të gjithëve në koncert. Vetëm një artist si ti di të performojë ashtu në skenë, edhe pse me dhimbje për humbjen e nënës.”

Këngëtarja Vesa Luma, po ashtu e pranishme në koncert, shkruan:

“Rame Lahaj humbi personin më të dashur, nënën e tij vetëm 2 orë para koncertit të madh në Prishtinë! Vetëm një artist i kalibrit të tij gjen forcën për të vazhduar koncertin me një profesionalizëm e kulturë të rrallë! Ngushëllime Rame Lahaj. Nëna ka kënduar bashkë me ty dhe me mijëra shqiptarë në Prishtinë. Krenar që të kemi!”

Në një postim në Instagram, tenori falenderoi ndjekësit për ngushëllimet.