Oh, po tani çfarë ndodhi? Asgjë e jashtëzakonshme. Thjesht disa komente nëpër Instagram, që vlejnë për t’u komentuar.
Thua? Ma merr mendja që po.
Më thuaj atëherë. Faqja @këng_të__reja në Instagram, postoi një kolazh me foto të Dafina Zeqirit dhe Elvana Gjatës me mbishkrimin “revolucioni i muzikës shqipe”.
Bukur, po pastaj? Nëpër komente, njerëzit vlerësuan arritjet e dy artisteve, ndër më të talentuarat dhe më të vlerësuarat, por disa, kryesisht fansa të tyre, e morën si krahasim dhe nisën komentet se cila ishte më e mira.
Ah, njerëzit. Nuk do t’i kuptoj kurrë. Mund të simpatizosh njërën më shumë se tjetrën, por vetëm kaq. Pse duhet të vendosen në peshore? Në një botë ideale, po.
Po në realitet? Një përdorues, shkroi: “Ligjin e bën Dafina, ligj të cilit po i nënshtrohet Elvana. S’kam asgjë kundër Elit, por Dafina është nana, vuj vuj vuj, kurse Elvana ujë, ujë ujë. D.m.th. Deshi nuk deshi, Elvana duhet t’u nënshtrohet ligjeve të Dafinës. Plus stilet në veshje, lirshmëri, të kënduarit në dialektin gegë (sepse Dafina është e para që ka thyer paragjykimet për dialektin gegë, i ka mbyt paragjykimet) e patjetër që Elvana i është nënshtruar këtij ndryshimi që ka sjell Dafina.
Prit, Elvana dhe Dafina janë lehtësisht të identifikueshme në stil dhe është pa mend të thuash që kopjojnë njëra-tjetrën. Janë shumë origjinale në stilin e vetë. Janë, padyshim.
Pastaj, sa për dialektin gegë, nuk besojmë se duhet t’ia atribuojmë patjetër dikujt. Mendoj që është revolucion i muzikës, ku artistët gjejnë mënyra të tjera për të qenë ndryshe. Pastaj, Elvana ka kënduar në dialektin gegë me “Mamës” që në 2007-n, kohë kur Dafina nuk ishte pjesë aktive e industrisë muzikore siç është sot. Qëndron.
Dielekti gegë mund të lidhet me suksesin e shumë artistëve nga Kosova që u bënë të preferuar në Shqipëri dhe padyshim që ndikuan te trendet. Patjetër.
Kthehemi te fansi. Kaq tha? Jo. Në një tjetër koment, shkruan, "Dafina është e para këngëtare që bëri revolucion në muzikën shqiptare, e modernizoi deri në palcë, solli trende të cilat kanë munguar më herët në skenën tonë. Pra e orientoi muzikën tonë nga perëndimi (dhe jo me përkthime greke, bullgare, turke etj).”
Tjetër? Sipas personit në fjalë, “Dafina shërbeu si motiv për këngëtaret e reja me moton ‘Sky is the Limit’ dhe ato pas gjithë paragjykimeve që patëm si popull, fituan vetëbesim dhe rrugëtuan karrierë ndërkombëtare, siç e kemi Era Istrefin, Dhurata Dorën, Kidën e plot të tjera...”
Sa për ta saktësuar, “Sky’s the Limit” gjendet në cdo platformë, nga Tumblr te Pinterest dhe është kaq e popullarizuar si shprehje sa me shumë mundësi, këta artistë që u përmendën e mbajnë mend nga kënga e famshme e Biggie-t. Të vazhdoj?
Po. Më tej, për ta përmbledhur, shkruan se Dafina nuk ka arritur sukses ndërkombëtar sepse i duhet pak më shumë fat. Era, thotë përdoruesi, nuk ka ndonjë talent të madh, por shpërtheu se pati fat.
Ç’ështje këndvështrimi. Padyshim.
Pse thua që Dafina është dakord? Thashë “duket sikur është dakord”.
E kuptoj, por pse? Sepse i ktheu koment duke shkruar, “Të dua! Ju dua! Fjalë të mëdhaja, një mesazh që kurrë s’do ta harroj!”.
Aa, çfarë ka dashur të thotë autori? S’e dimë, dimë çfarë ka thënë.
Dhe ka thënë çfarë? Nuk e ka kundërshtuar.
Qartë.
