Bashkia e Tiranës, duke filluar nga data 1 korrik, do të rikthejë shitjen e abonesë së përgjithshme për qytetarët që përdorin transportin publik, ndonëse fillimisht ishte parashikuar që aboneja e përgjithshme të dilte në treg në shtator.

Euronews.al raporton se Këshilli Bashkiak miratoi vendimin, pasi gjatë muajit qershor Drejtoria e Transportit e Trafikut Rrugor arriti të kryejë më shpejt procesin e mbledhjes së të dhënave për shërbimin e transportit qytetës.

Vendimi për të hequr nga qarkullimi për tre muaj abonenë e përgjithshme shkaktoi pakënaqësi të shtuar tek qytetarët, të cilët zhvilluan protesta dhe e konsideruan këtë akt si të dëmshëm.

“Bashkia e Tiranës ka planifikuar një periudhë tre mujore për kryerjen e verifikimeve dhe matjeve për riorganizimin dhe ristrukturimin e shërbimit të transportit. Gjatë kësaj periudhe, Bashkia e Tiranës do t’ju kërkojë operatorëve të transportit publik qytetës rikthimin në kushte të plota të ofrimit të shërbimit, sipas kushteve të kontratës, duke respektuar kushtet teknike para pandemisë dhe duke ofruar shërbim të plotë me 100% të kapacitetit të mjeteve në operim. Për këtë arsye, aboneja e përgjithshme e transportit publik do të hiqet nga qarkullimi vetëm për një periudhë të përkohshme 3 mujore (qershor, korrik, gusht), me qëllim përshtatjen e strukturës së udhëtimit me volumet e reja të udhëtimit, si dhe vendimet që do të lidhen me itineraret e linjave, frekuencat, kushtet e shërbimit, gjatë periudhës së kryerjes së plotë të shërbimit.” – u tha në njoftimin e fundit të majit.

Për shkak të përshpejtimit të procesit, nxitur ndoshta edhe nga protestat e qytetarëve, aboneja e përgjthshme do të mund të blihet duke filluar nga data 1 korrik.