Largoni alergjenët brenda ambienteve të mbyllura, që mund të shkaktojnë probleme në frymëmarrje dhe sëmundje të tjera.

Për njerëzit që janë të ndjeshëm ndaj alergjenëve apo që kanë probleme me frymëmarrjen, muajt e ftohtë (ku ajrosja është e pakët si dhe stina e pranverës me polenet që sjell) mund të shkaktojë shumë probleme. Kështu gjatë dimrit, ajri i ndenjur dhe sistemet e ngrohjes mund të shtojnë sasinë e grimcave të pluhurit që shkaktojnë alergji. Nga ana tjetër me ardhjen e pranverës shumë njerëz, alergjikë apo jo fillojnë të shfaqin probleme për shkak të poleneve nga bari dhe pemët.

“Shumica e gjërave që shkaktojnë probleme nuk kanë aromë” thotë Dr. Nicholas BuSaba, profesor i asociuar në Universitetin e Mjekësisë në Harvard. “Kjo do të thotë që në rastin më të madh të rasteve nuk ka asnjë tregues që mund të paralajmërojë për një problem të mundshëm”. Pra mbeten vetëm simptomat që një reagim alergjik mund të shkaktojë – siç janë problemet në frymëmarrje, lodhje, përgjumje apo edhe probleme në tretje.

Përmirësimi i cilësisë së ajrit

Nëse i kushtoni pak më shumë rëndësi cilësisë të ajrit brenda ambienteve ku jetoni apo punoni, kjo mund t’ju ndihmojë shumë në largimin e simptomave të alergjisë duke përmirësuar shëndetin tuaj dhe cilësinë e jetesës.

Edhe nëse nuk do të mund t'i eleminoni 100% alergjenët brenda shtëpisë tuaj, ju mund të ulni numrin dhe ekspozimin ndaj tyre, duke bërë disa ndryshime të thjeshta. Më poshtë do të listojmë disa mënyra me anë të cilave mund të përmirësoni cilësinë e ajrit dhe në të njëjtën kohë të reduktoni simptomat e alergjisë.

Pastërtia. Një shtëpi e pastër është në të njëjtën kohë edhe një shtëpi më e shëndetshme. Kështu higjiena e mirë brenda shtëpisë e pakëson në mënyrë të konsiderushme pluhurin dhe pushin e kafshëve (për ata që kanë kafshë shtëpiake). Kur pastroni duhet të fokusoheni tek mbledhja e pusheve të kafshëve, pastrimin e shenjave të mykut dhe pluhurave:

- Pastroni me fshesë me korent tapetët dhe rrugicat e tjera të paktën 2-4 herë në javë. Kujdesuni që fshesa me korent të jetë e pajisur me filtra HEPA. Gjithashtu një shtëpi me pllaka ose parket e ul ndjeshëm nivelin e alergjenëve në krahasim me një shtëpi të shtruar me tapet apo moket.

- Ndërroni dhe lani rregullisht çarçafët dhe perdet si dhe veshjet e karrigeve apo divanëve pasi ato kanë tendencë të tërheqin alergjenët (sidomos nëse mbani kafshë shtëpiake). Akademia Amerikane e Alergjisë, Azmës dhe Imunologjisë rekomandon që larjet të bëhen në temperaturë të paktën 60°C. Në treg gjithashtu mund të gjeni jastëkë dhe dyshekë që janë me ajërosje dhe anti-alergjikë si një zgjedhje e mirë dhe e rekomandueshme.

Mbajini bimët jashtë. Bimët janë pa dyshim shumë të bukura, por ato mund të grumbullojnë dhe të nxisin rritjen e mykut. Kështu përpos mendimit se disa bimë mund të përmirësojnë ajrin sepse çlirojnë oksigjen, ato përsëri mbeten faktorë që krijojnë alergji tek shumë njerëz dhe nëse vendosim në balancë të mirat dhe të këqijat, mund të themi se më shumë shkaktojnë dëme sesa ndihmojnë. Ndryshoni filtrat. Nëse keni një sistem kondicionimi, ju duhet të siguroheni që filtrat të ndërrohen ose pastrohen rregullisht pasi pluhurat e grumbulluara në to mund të riqarkullojnë në ambientet tuaja të brendshme.

Investoni në një pajisje për pastrimin e ajrit. Nëse jeni alergjikë edhe në mjediset e brendshme, por nuk mund të kontrolloni burimin e alergjisë – për shembull jeni alergjikë nga një kafshë shtëpiake të cilën nuk doni ta largoni nga shtëpia – mund të ndihmojë shumë një pajisje e pastrimit të ajrit. Ju mund ta vendosni atë në sallonin e shtëpisë suaj (ose në një pjesë të shtëpisë ku kaloni më shumë kohë) dhe kjo pajisje, sidomos ato me pastrues ionikë, do t’u ndihmojnë jo vetëm në eleminimin e grimcave të vogla të pluhurit dhe alergjenëve të tjerë, por edhe të eleminojë aromat, polenat, pushin etj, duke ju dhënë benefite afatgjata dhe duke shmangur mundësinë e sëmundjeve respiratrore dhe infeksioneve të ndryshme.

Thithës lagështire për zonat me lagështi të lartë. Për shtëpi me lagështi ju mund të merrni në konsideratë edhe një pajise që thith lagështirën për të prandaluar krijimin e mykut. Këto pajisje gjithashtu do t’ju ndihmojnë të eleminoni kondesimin që krijohet në xhamat e dritareve, atë të shkaktuar nga gatimi, si dhe ndihmon në tharjen e rrobave. Sigurohuni gjithashtu që banjot të jenë të mirë ajrosura dhe pastroni menjëherë çdo shenjë myku nga muret, dushi, dritaret dhe kornizat.

Në fund, por jo nga rëndësia, ajroseni çdo ditë shtëpinë tuaj. Edhe në muajt e ftohtë, hapini dritaret dhe lejoni ajrin e pastër në ambientet ku jetoni në mënyrë që ajri të qarkullojë në çdo cep sepse ajër i pastër do të thotë shëndet i mirë.