Njerëzit priren të mendojnë se mund t'i kontrollojnë mendimet e tyre, por nga ana tjetër ka edhe reagime të pavullnetshme, të cilat sado që përpiqemi, na ndodh të mos i kontrollojmë dot. Një reagim i tillë është edhe skuqja -  përgjigje spontane që ne nuk mund ta bëjmë me qëllim, as nuk mund ta "falsifikojmë", një reagim unik i qenieve njerëzore.

Çfarë ndodh me trupat tanë kur skuqemi

Skuqja është një reagim i natyrshëm ndaj sistemit nervor simpatik, i cili është përgjegjës për disa nga përgjigjet e shpejta të pavullnetshme të trupave tanë. Kur ky sistem percepton disa lloje specifike të emocioneve, ai u dërgon një mesazh gjëndrave të veshkave për të lëshuar një hormon të quajtur adrenalinë. Kur ky hormon lirohet, rrahjet e zemrës sonë fillojnë të "garojnë", gjë që nga ana tjetër, bën që enët e gjakut të zgjerohen, duke rritur nivelet e oksigjenit në gjak dhe qarkulimin e gjakut.

Kërkimet kanë gjetur prova se zonat më të ndjeshme ndaj skuqjes, të tilla si faqet, qafa dhe veshët (veçanërisht), kanë një strukturë tjetër anatomike që e bën të mundur këtë reagim spontan dhe të pakontrollueshëm.

Shkaqet e mundshme të skuqjes

Emocionet: Sikleti, ndrojtja, rënia në dashuri, apo edhe zemërimi mund të jenë arsye pse disa pjesë të fytyrës sonë bëhen të kuqe.

Temperatura: Kur temperatura e trupit tonë rritet për shkak të çdo lloj procesi viral, është e zakonshme që skuqja të shfaqet. Nëse kjo është arsyeja, kur temperatura ulet, skuqja do të zhduket së bashku me pjesën tjetër të simptomave.

Ushqim ose pije: Kur hani diçka që është shumë pikante për shembull, kjo mund të çojë në skuqje. E njëjta gjë mund të ndodhë nëse pini diçka që është shumë e nxehtë.

Qasje të ndryshme për të kuptuar skuqjen

Nuk ka një shpjegim plotësisht të saktë për qëllimin që ka në të vërtetë skuqja në jetën tonë të përditshme. Sidoqoftë, 3 teori janë aktualisht më të pranuarat dhe më të besueshmet.

Teoria e komunikimit: Sipas këtij propozimi, skuqja ka funksionin e transmetimit të informacionit te bashkëbiseduesit tanë ose te njerëzit e tjerë përreth nesh. Pra, përmes saj, mund të siguronim informacion edhe pa komunikuar verbalisht.

Vëmendje e padëshiruar sociale: Kjo teori pretendon se skuqja duket si një mënyrë që personi që na shikon të kuptojë shpejt se nuk jemi të kënaqur me vëmendjen që po na japin. Prandaj, është diçka krejtësisht e pashmangshme dhe lind në përgjigje të situatave kur jemi duke u vëzhguar, lavdëruar ose thjesht jemi pjesë e një vëmendjeje të padëshiruar.

Ekspozimi: Në këtë rast, skuqja do të shfaqej si një përgjigje ose si pasojë e frikës se mund të zbulohej një lloj informacioni privat, si sekret ose një gënjeshtër. Sipas kësaj teorie, është një mënyrë e "të tradhtuarit të vetes".

Burimi: Healthline, Bright Side