“Me kohë, nisa të besoja se mund ta ndieja kur ai mendonte për mua – se vinte prej tij ai sëmbim që ndieja të më rrëshqiste tërthor zverkut e të më zbriste nga supi gjer te gjatësia e krahëve.” – fragment nga “Të padukshmet”, Lara Prescott.
Romani (me titull në original “The secrets we kept”) është rrëfimi i një historie të jashtëzakonshme, në një epokë kur lufta mes perëndimit dhe lindjes kishte arritur kulmin. Shumë prej nesh e kanë lexuar “Doktor Zhivagon” e shkrimtarit rus Boris Pasternak, por pak e dinë historinë e botimit të tij.
Autorja Lara Prescott rrëfen komplotin e fshehtë të CIA-s për botimin e librit jashtë ish-Bashkimit Sovjetik. Aty rrëfehet edhe historia e paligjshme e dashurisë mes Pasternakut dhe Olga Vsjevollodovnës.
Shënim: Agjencia Qendrore e Inteligjencës (CIA) është një shërbim në SHBA që merret me mbledhjen, përpunimin dhe analizimin e informacioneve të sigurisë kombëtare nga e gjithë bota, kryesisht përmes përdorimit të inteligjencës njerëzore.
Në kulmin e Luftës së Ftohtë, dy vajza, në dukje më se të zakonshme, daktilografiste në CIA, zgjidhen mes shumë të tjerash dhe u besohet misioni i rëndësishëm: të nxjerrin dorëshkrimin e romanit “Doktor Zhivago” nga Bashkimi Sovjetik që vepra madhore e Pasternakut të përhapet në të gjithë botën.
“Një roman romantik dhe i mrekullueshëm, i mbushur me një trupë sekretaresh të paharrueshme,” e përshkruan New York Times. “Prescott krijon një histori pasioni, spiunazhi dhe propaganda,” shkruan Wall Street Journal.
