Orlando Bloom është padyshim një burrë i lumtur! Gruaja e tij aktuale, Katy Perry dhe ish-gruaja Miranda Kerr shkojnë aq mirë me njëra-tjetrën sa diskutojnë publikisht përmes një Live në Instagram mëmësinë dhe çështje të tjera.

Kerr dhe Bloom kanë një djalë bashkë e ndërsa pas ndarjes prej aktorit, modelja u martua me Evan Spiegel, me të cilin ka dy fëmijë të tjerë. Nga ana tjetër, Orlando prej një viti është bërë sërish baba, nga romanca me Katy Perry-n.

Tani, Katy dhe Miranda treguan si dinë ta mbështesin njëra tjetrën dhe t'i përshtaten asaj që duhet familje moderne.

"Një nga gjërat më të mira që përfiton kur je pranë Miranda-s është se ke shansin të provosh gjithë produktet e saj. Aq më tepër kur djali i saj vjen në shtëpi me gjithë çantën e produkteve."- u shpreh Perry, si për të mbështetur linjën e re të kremrave të modeles. 

"Në familjen tonë moderne ajo është më e përgjegjshmja nga të gjithë për shëndetin."- vazhdoi Katy duke shtuar se shumë këshilla për ushqimet e shëndetshme dhe për përdorimin e produkteve natyrale i merr nga ish-bashkëshortja e partnerit.

Të dyja ranë dakord për faktin që mëmësia ka qenë një bekim në jetën e tyre.

"Fëmijët janë dashuria ime më e madhe. Eshtë gjëja më e bukur në botë të jesh nënë."- u shpreh Kerr e ndërsa Perry vazhdoi duke thënë se "s'kishte përjetuar kurrë më parë një ndjesi aq të fortë sa kur solli në jetë vajzën." 

Kjo s'është hera e parë që Katy Perry dhe Miranda flasin për mëmësinë apo vlerësojnë njëra tjetrën publikisht. Nëntorin e shkuar, Miranda Kerr tha se "e adhuron" Katy dhe se është shumë e lumtur për atë dhe aktorin. Nga ana tjetër, këngëtarja është shprehur se historitë e saj të mëmësisë e kanë ndihmuar shumë.

Burimi: Glamour