Amazon thotë se punonjësit nuk urinojnë në shishe plastike. Intervistat me drejtuesit e shpërndarjeve dhe prova të tjera tregojnë ndryshe.
Të mërkurën, Amazon shkroi në Twitter për politikanin dhe biznesmenin Mark Pocan: "Ju nuk e besoni me të vërtetë atë gjënë e urinimit në shishe? Nëse do të ishte e vërtetë, askush nuk do të punonte për ne."
“Të paguani punëtorët 15 dollarë në orë nuk ju bën një ‘vend pune progresiv’ kur ju bllokoni sindikatat dhe i bëni punëtorët që të urinojnë në shishe uji", shkroi Pocan.
Ndonëse Amazon e mohon "këtë gjënë e urinimit në shishe", pesë shoferë aktualë dhe të mëparshëm të Amazon thanë për Insider se urinimi në shishe ishte pjesë e punës.
"Ata nuk të detyrojnë vërtet që të urinosh në shishe," tha Savannah për Insider, i cili u largua nga puna si shofer për një nga ofruesit e shërbimeve të dorëzimit të palëve të treta të Amazon. "Thjesht nuk ke kohë të shkosh në tualet.”
Ai dhe disa shoferë të tjerë që folën me Insider, treguan në kushte anonimiteti ose kërkuan që të përdoren vetëm emrat e tyre të parë në mënyrë që të flasin sinqerisht për situatën. Identitetet e tyre dhe fakti që kanë punuar si shoferë në Amazon janë konfirmuar.
Pavarësisht se kompania ka vendosur në kohën e pushimit - një drekë 30-minutëshe dhe dy pushime 15-minutëshe - disa shoferë thonë se ata ose nuk munden ose nuk duan t'i marrin ato.
"Ata regjistrojnë gjurmët e lëvizjeve - sa herë ti ndalon, sa shpejt i jep pakinës," tha Enrique Sanchez, i cili punoi si shofer për tetë muaj në vitin 2020. "Është një kompani shumë agresive që ka gjeneruar kaq shumë të ardhura, fitime gjatë viteve të fundit, dekada - por e gjitha ka qenë në kurriz të keqtrajtimit të punëtorëve."
Një shofer në Oklahoma i cili punon për një shërbim të dorëzimit të palëve të treta që transporton pako në emër të Amazon tha për Insider se është e zakonshme të futesh në një furgon në fillim të turnit dhe të gjesh një shishe të mbushur me urinë.
"Unë nuk jam duke thënë se Amazon po e inkurajon këtë gjë. Por ju garantoj se çdo shofer që ka punuar atje për shumë kohë, ka hyrë në një furgon dhe ka parë një shishe të tejdukshme të mbushur me diçka që padyshim nuk është lëng molle. Ka ndodhur. Ndodh,” tha ai.
Një shofere tregoi se ajo e mbante urinën deri në atë pikë sa kishte infeksione të fshikëzës. Ajo tha se kohët e fundit vendosi të blinte një sistem urinar për femra, të cilin e sjell në punë së bashku me një shishe, dezinfektues dhe letra.
“Është çnjerëzore, më e pakta që mund të them,” tha ajo.
Edhe shoferët që kryesisht flasin pozitivisht për kompaninë thanë se urinimi në shishe ishte një praktikë e zakonshme.
Ka edhe raporte të punëtorëve të magazinave të Amazon që urinojnë në shishe. Në vitin 2018, një sondazh i 241 punonjësve të magazinës Amazon në Angli zbuloi se 74% thanë se shmangnin që të shkonin në tualet në punë. Punonjësit thanë se kishin frikë nga pushimi nga puna ose frika se mos nuk përmbushnin normën nëse përdorin tualetin.
Rreth të njëjtën kohë, James Bloodworth, një reporter i fshehtë, tha se punonjësit kishin një sistem me "shishe tualeti" në magazinën ku ai punonte në Mbretërinë e Bashkuar.
“Për ata që punonin në katet e sipërme, tualeti ishte rreth katër kate më poshtë. Njerëzit thjesht urinonin në shishe sepse jetonin me frikën e kohës që ikte dhe humbjes së vendit të punës,” tha ai asokohe për The Sun.
Ndonëse Amazon thotë se "askush" nuk do të punonte për kompaninë nëse njerëzit do të duhej të urinonin në shishe, problemi duket të jetë i zakonshëm. Një postim i nëntorit të vitit 2019 në faqen e internetit për Qendrat për Kontrollin dhe Parandalimin e Sëmundjeve (CDC) thotë:
"Shumë punëtorë në një gamë të gjerë të industrive dhe profesioneve thonë se nuk mund të shkojnë në tualet. Postimi përmendi sondazhet e mësuesve, punëtorëve të përpunimit të shpendëve, infermierëve, shoferëve të autobusëve dhe taksistëve."
Burimet: Insider, Guardian, The Washington Post
