Nëse doni të azhornoheni për zhvillimet e fundit të rrjeteve sociale, ju prezantojmë me Dispo-n. Aplikacioni është themeluar nga YouTuber-i David Dobrik dhe sjell një përvojë dixhitale pak më ndryshe se të tjerat.

Dispo kombinon rrjetin social dhe fotografinë e paprekur, në një mënyrë që të kujton Instagramin e hershëm. Pa asnjë filtër, asnjë mundësi për editim përveç blicit, aplikacioni synon të krijojë një përvojë sa më të vërtetë virtuale dhe sa më të përafërt me jetën reale.

Në mënyrë të ngjashme me Clubhouse, për t'u bërë pjesë e Dispo-s duhej një ftesë, por prej datës 9 mars, platforma deklaroi se ky veprim s'është më i nevojshëm dhe të gjithë mund t'i bashkohen aplikacionit vetëm duke e shkarkuar në Apple App Store. 

Ashtu si në Instagram, edhe në Dispo mund të ndiqni njerëz dhe të ndërveproni me ta, por këtu nuk ka një faqe "Explore", kështu që nëse nuk keni kërkuar për përdorues specifik apo nëse s'keni parë ndonjë profil nga profili i miqve tuaj, nuk do t'ju shfaqen profile/foto të ndryshme si në menunë "explore" të Instagramit. Kjo e bën atë një opsion të mirë rrjetesh sociale që nuk ju lë të shpenzoni aq kohë sa mund të shpenzonit në TikTok, Instagram apo një platformë tjetër.

Burimi: Bustle