Në intervistën për Oprah Winfrey, princ Harry dhe Meghan Markle zbuluan se janë në pritje të një vajze. Fill pas kësaj, njerëzit nisën të aludonin për emrin.

Në Oddschecker – faqja e krahasimit të basteve – të shumtë janë ata që mendojnë se vogëlushja do të quhet Diana. Emri i nënës së ndjerë të Harry-t është më i përmenduri në rrjete sociale.

Përpos Diana-s, emra të tjerë të cilët renditen në Top5 janë: Allegra, Isabella, Alice dhe Abigail.

Në listë janë gjithashtu Phillipa (në nder të princit Philip, gjyshi i princit Harry), Kamala (nisur nga zëvendëspresidentja e SHBA-së, Kamala Harris). As emri i Oprah-s nuk mungon.

Megjithatë, pavarësisht popullaritetit të mendimit se vogëlushja do të quhet Diana, një burim pranë tyre u shpreh për New York Post se ka pak të ngjarë të ndodhë kështu. Ata mund ta konsiderojnë emrin Diana si një emër të mesëm, por ky është tashmë emri i mesëm i vajzës 5-vjeçare të princit William dhe Kate Middleton, princesha Charlotte, emri i plotë i së cilës është Charlotte Elizabeth Diana.

"Ka shumë të ngjarë që të mos e quajnë vajzën e tyre Diana. Shqetësimi i tyre më i madh është se kjo do ta bënte vajzën një shënjestër më të madhe për mediat dhe do të rriste ndjeshëm interesin e publikut për jetën e fëmijës," tha burimi.

Sipas burimit, ata gjithashtu "frikësohen" se emri "do të ushtronte shumë presion mbi fëmijën dhe do të bënte gjithçka të vështirë, që nga regjistrimi në shkollë e deri te udhëtimet".