“Nuk është gjithmonë e lehtë, por gjithmonë ia vlen,” e përshkroi Sara Hoxha procesin e gjidhënies, teksa ushqente të voglën Poem Blu në Galerinë Kombëtare të Arteve.
“Nuk paska vend tjetër ku t’i japë gji” dhe “Pse nuk zhvishesh fare që të të shohë gjithë bota” ishin disa prej komenteve, tipike për një situatë të tillë sepse nuk është hera e parë që fotot ku nënat ushqejnë me gji fëmijët shihen si tabu. Mjafton të kujtojmë disa raste:
Në maj të vitit 2019, Elita Rudi postoi në Instagram një foto ku ushqente me gji djalin, Zërin. Elita e dinte se në mos dy, një do të ofendohej nga veprimi e prandaj vendosi t’i paraprijë situatës. “Nëse ofendoheni kur unë ushqej me gji fëmijën tim, mbulo kokën me batanije. Fëmija im ka të drejtë të ushqehet,” shkroi ajo.
Diçka të ngjashme tha edhe Bieta Sulo pasi ushqeu me gji djalin në transmetim live në “Në shtëpinë tonë” në prill 2018. “Është njësoj sikur djalin ta ketë marrë uria dhe unë të mos e ushqej. Nuk ka rëndësi vendi. Në rrugë, në shtëpi apo në transmetim, nëse fëmija do të pijë qumësht, fëmija do të pijë qumësht,” tha ajo.
Emina Cunmulaj ka ngritur gjithashtu zërin se një veprim i tillë nuk është turp, por një mrekulli që natyra ia fal grave për të krijuar një lidhje të pazëvendësueshme me fëmijën. “E dashuroj që mund të krijoj një lidhje të tillë me time bijë dhe s’do ta ndërroja edhe po të më jepnin botën, do të vazhdoj ta ushqej me gji për sa kohë të mundem,” u shpreh ajo në gusht të 2016-s.
Në maj të dy viteve më parë, me rastin e ditëlindjes së binjakëve Elizabeth dhe Dylan, show-girl Heather Parisi postoi në Instagram një foto të saj duke ushqyer me gji të vegjëlit vite më parë. Nuk qenë të paktë ndjekësit që e kritikuan për faktin që zgjodhi të postojë diçka kaq private si ushqyerja me gji. Disa të tjerë theksuan edhe “lakuriqësinë”.
Në maj të 2017-s, Larissa Waters nga Australia u bë politikania e parë që ushqente me gji fëmijën në parlament. “Sinqerisht është qesharake, me të vërtetë, që ushqyerja e foshnjës është një lajm ndërkombëtar. Shpresoj të kem qenë në gjendje t’u dërgoj një mesazh grave të reja që i përkasin parlamentit,” tha ajo.
Në shtator të 2015-s, aktorja Alyssa Milano, e njohur si mbështetëse e ushqyerjes me gji, ndau me ndjekësit duke ushyqer me gji vajzën e saj të porsalindur Elizabella. Fotoja solli reagime të shumta në rrjete sociale.
Në Entertainment Tonight pak kohë më vonë, Milano tha: "Të gjithëve u duket se nuk ka asnjë problem me gjoksin e zhveshur të Miley Cyrus. Unë mendoj se njerëzit janë më rehat me gjoksin e zbuluar në mënyrë seksuale sesa kur kanë të bëjnë me diçka më natyrore siç është ushqyerja me gji e një tjetër qenieje njerëzore.” Ajo shtoi se nuk ka asgjë për t’u turpëruar nga lidhja e nënës me fëmijën. "Normalizimi i ushqyerjes së fëmijës me gji në publik mund të jetë një çështje e rëndësishme për gratë dhe për deseksualizimin e gjoksit. Po, ato janë të bukura dhe tregojnë seksualitetin e femrave, por qëllimi i tyre kryesor është të ushqejnë me gji një tjetër qënie njerëzore.”
Kjo çështje ka nxitur edhe protesta:
Nënat duke ushqyer me gji foshnjat gjatë një proteste në Lausanne, Zvicër.
Nënat në Filipine morën pjesë në muajin e ndërgjegjësimit për ushqyerjen me gji.
Foshnjat hanë, shumë. Në fakt, nëse një i porsalindur mund të shkruante një kujtim, me gjasë do të shkruante: "Hëngra, dola jashtë [jashtëqitje], fjeta dhe hëngra prapë.” Pra, duhet të ushqehet.
Një përgjigje e zakonshme ndaj ushqyerjes me gji është se i bën të tjerët të ndihen jo rehat. Në një shoqëri ku gjinjtë shihen si objekt seksual, pamja e një foshnje që ushqehet në gji mund të duket e papërshtatshme. Por është mendim i gabuar.
Ekspertët pajtohen se të gjithë duhet të mësojmë se si të reagojmë dhe të respektojmë këtë proces shumë natyror.
- Për realizimin e artikullit, u përdorën pjesërisht informacione nga: BBC, USA Today, Healthline, Deutsche Welle, WebMD
