Java e modës vjeshtë-dimër 2021 nuk vjen si zakonisht për Moschino-n këtë vit. Në vend të shfaqjes tradicionale ku modelet sfilojnë nëpër pasarela para një audience, drejtori artistik i markës mendoi diçka tjetër. Një film  12-minutësh ku emra të famshëm nga bota e modës prezantojnë koleksionet e reja.

Mes shkëlqimit të tapetit të kuq dhe printeve të kafshëve Jeremy Scott vendosi që gjatë javës së modës në Milano të prezantojë një mini-film të quajtur "Jungle Red", ku stile të ndryshme do të prezantohen nga emra të njohur të modës dhe pasarelave. Pjesë e kastit janë Dita von Teese, Stella Maxwell, Precious Lee, Winnie Harlo, Hailey Bieber dhe Soo Joo Park. Maye Musk, nëna e miliarderit Elon Musk është moderatorja e shfaqjes.

Bazuar në skenën e famshme të teatrit nga George Cukor në  1939, "The Women", drejtori artistik i Moschino-s u frymëzua për ta risjellë në skenë gruan e shekullit të 20-të të përditësuar. Në filmin e tij, Scott ka përfshirë modele të moshave dhe masave të ndryshme trupore.

"Nuk ka vetëm një grupmoshë të caktuar apo një standart bukurie. Ka rraca të ndryshme, ka trupa të ndryshëm. Thelbi i kësaj është të jemi sa më real ndaj jetës së vërtet dhe jo ndaj steriotipev që Hollywood-i na bënte të perceptonim, veçanërisht në 1930-ën."- tregon ai.

Në filmin e modës nga Moschino, modelet shihen të kalojnë nga ditët e zakonshme në punë drejt kohës së lirë në fundjavë ku vizitojnë muzeume, teatro apo vende periferike me veshje të konceptuara për t'ju përshtatur secilës prej tyre.

"Jungle Red" kombinon mjeshtërisht veshjet e zakonshme dhe ato glamoroze, me modelet që sfilojnë përgjatë çdo skene të shoqëruar me përshkrime të shkurtra dhe sfonde që ndryshojnë nga një atmosferë në tjetrën.

Qershia mbi tortë ishte Dita von Teese e cila shfaqet në fundin e filmit e veshur me një fustan të kuq me detaje në formë zemrash të zeza dhe fundshpinën komplet të zbuluar!

Burimi: CNN