Eksfoljimi kimik është një trajtim që mund të përdoret nga të gjitha llojet e lëkurave. Ai bën të mundur stimulimin e ripërtëritjes qelizore duke nxitur daljen në sipërfaqe të lëkurës së re. Si i tillë, ky proces zbeh hiperpigmentimin në lëkurë, ndihmon në reduktimin e akneve, pamjen e rrudhave dhe pastrimin e poreve të lëkurës. Në momentin që përfshini një trajtim të tillë në rutinën tuaj, duhet të keni parasysh disa gjëra të thjeshta.
1 – Zgjedhja e llojit të eksfoljuesit kimik
Eksfoljimi kimik mund të kryhet në mënyra të ndryshme duke filluar nga peeling, acidet hidroksi (Alfa, Beta, Poli) ose enzimat në bazë të nevojave dhe llojit të lëkurës.
2 – Sa shpesh duhet ta përdorni?
Nuk ka rëndësi forma e eksfoljuesit kimik, rëndësi ka që të mos e përdorni më shpesh se 1-3 herë në javë (në bazë të llojit të produktit). Këtu përfshihen edhe larësit që përmbajnë përbërës eksfoljues.
3 – Me çfarë duhet shoqëruar?
Kur përdorni eksfoljues kimik, duhet të eleminoni përbërësit e tjerë aktivë që stimulojnë ripërtëritjen qelizore. Shumë përbërës aktivë në të njëjtën kohë mund të irritojnë lëkurën.
4 – Në çfarë përqëndrimi duhen përdorur?
Për një lëkurë që nuk është mësuar me eksfoljim kimik, nuk duhen përdorur produkte me përqendrim përbërësish eksfoljues më e lartë se 10% kur bëhet fjalë për përdorim vetjak (jo peeling të kryer nga dermatologe, estetiste etj).
5 – Me çfarë produktesh mund të bëni eksfoljim?
Kjo varet nga rutina juaj dhe nevojat e lëkurës. Mund të jetë një larës, tonës, mist, maskë, serum, ampula, krem. Thjesht mos përdorni asnjërën nga këto çdo ditë.
6 – SPF! SPF! SPF!
Eksfoljimi kimik e bën lëkurën shumë të ndjeshme ndaj diellit. Si në çdo postim tjetër, po ju rikujtoj që kremi i diellit duhet vendosur 365 ditë në vit, SIDOMOS nëse eksfoljimi kimik është pjesë e rutinës suaj.
- Shkruar për Anabel nga Sara Gjylbegu, e apasionuar pas kujdesit të lëkurës dhe kuratore e beauty blogger @20ecavjec.
