Gjithë territori i Shqipërisë është përfshirë nga temperaturat e ulëta nën zero gradë Celcius, shoqëruar me rreshje bore, tipike për zonat malore në këtë stinë, megjithëse rreshjet e borës kanë përfshirë pothuajse gjithë qytetet.

“I gjithë territori i vendit tonë ditën e sotme është mbizotëruar nga reshje shiu me intensitet mesatar dhe me reshje dëbore. Si rezultat i reshjeve të borës në disa qarqe të vendit kemi pasur problematika në disa akse rrugore. Ditët në vijim pritet mot i kthjellët, por për shkak të temperaturave të ulëta do të ketë ngrica në rrugë,” u shpreh Ministria e Mbrojtjes përmes një deklarate. “Forcat e Armatosura në bashkëpunim me Policinë e Shtetit kanë rritur gatishmërinë në të gjithë vendin për t'u ardhur në ndihmë qytetarëve. Aktualisht trupat dhe mjetet e FA janë të angazhuara në zonën e Nënshkodrës për të ndihmuar lëvizjen e qytetarëve në njësitë administrative Ana e Malit dhe Dajç, të prekura nga përmbytjet.”

Ministria e Mbrojtje u bëri thirrje qytetarëve që të evitojnë lëvizjet jo të domosdoshme, sidomos në akset me prani të theksuar të ngricave.

Sipas të dhënave të fundit nga Autoriteti Rrugor Shqiptar, “problematika kryesore është rruga Milot–Lezhë, e cila ka patur borë shoqëruar me erëra shumë të forta”.

Federata Shqiptare e Futbollit shtyu ndeshjet e futbollit në të gjitha nivelet e kampionateve deri të shtunën e ardhshme, datë 20 shkurt 2021. “Ndeshjet e parashikuara për t’u luajtur këtë të diel dhe gjatë javës, do të luhen në një datë të mëvonshme, që do të përcaktohen nga Sektori i Garave në FSHF."

Foto dhe video: