"Shumë njerëz më shohin dhe mendojnë se më njohin, por nuk më njohin aspak. Ky jam unë i vërtetë. Unë jam një person i përulur, një person i ndjeshëm. Një person që kujdeset për të tjerët, i cili dëshiron të ndihmojë të tjerët. ”- Cristiano Ronaldo.

Megjithëse debatet me gjasë do të zgjasin për dekada (dhe fansat e Messi-t e dinë mirë pse), le të themi vetëm se Cristiano Ronaldo, që feston sot 36-vjetorin, është një nga futbollistët më të mirë në botë dhe një nga më të mëdhenjtë e të gjitha kohërave. Megjithëse e filloi karrierën e tij me Manchester United, emrin e bëri me Real Madrid, një ekip, dominimi i të cilit gjatë kohës së tij atje është në thelb i pashembullt. Lexoni në vijim disa fakte interesante për jetën e tij.

E fillojmë me emrin (e gjatë). Cristiano Ronaldo dos Santos Aveiro u rrit në ishullin e vogël të Madeira-s, Portugali. Emri iu vendos nga ish-presidenti i SHBA-së, Ronald Reagan, aktori i preferuar i të atit. Familja e tij nuk kishte shumë para kur ai ishte në rritje. Cristiano ka dy motra dhe një vëlla dhe të gjithë flinin në të njëjtën dhomë gjumi. Karriera si një futbollist profesionist dukej si një nga mënyrat e vetme për të dalë plotësisht nga varfëria. Kjo është arsyeja pse prindërit e mbështetën plotësisht talentin e tij dhe le të themi se u doli mirë.

Ronaldo thotë se filloi të lante dhe hekuroste rrobat në moshën 11-vjeçare. Ai mësoi se si të gatuante dhe të kujdesej për veten për të gjitha nevojat themelore, në vend që të mbështetej te prindërit. Ai i vlerëson prindërit që e detyruan të mësojë këto përgjegjësi në një moshë të re sepse e kanë bërë të ndihet më i fortë.

Kur Ronaldo ishte 12 vjeç, e gjithë familja u zhvendos 600 milje larg Lisbonës. Ata dëshironin që ai të luante për disa nga ekipet kombëtare të të rinjve, të cilat ishin të vendosura atje. Ndonëse ishin portugezë, shtëpia e tyre në Madeira është në të vërtetë më afër Afrikës, kështu që kishin zakone unike dhe një theks ndryshe në të folur. Si fëmijë, Ronaldo u rrit duke adhuruar Luis Figo, i cili konsiderohej si futbollisti më i madh portugez i të gjitha kohërave, para se të shfaqej Ronaldo.

Një nga historitë më ikonike rreth Ronaldos përfshin atë dhe një mik të quajtur Albert Fantrau. Thuhet se Ronaldo dhe Albert luanin në një ekip bashkë. Një trajner u tha djemve se kushdo që do të bënte më shumë gola gjatë lojës, do të fitonte një bursë për të ndjekur një akademi futbolli në Lisbonë, një mundësi potencialisht për të ndryshuar jetën. Albert dhe Ronaldo ishin të dy njësoj dhe në një moment, kur Albert kishte mundësinë për të bërë gol, ia kaloi topin Ronaldos. Thuhet se Albert e ka shpjeguar vendimin duke thënë se e bëri sepse e dinte që Ronaldo ishte një lojtar më i mirë se ai dhe ishte i destinuar të bëhej profesionist. Mesa duket, CR7 nuk e harroi sakrificën. Kur nisi të bënte para, i bleu një shtëpi, një makinë dhe i dha para mikut të fëmijërisë në shenjë falenderimi.

Kur ishte vetëm 13 vjeç, ai u pagua 1,500 euro për t'u bashkuar me Sporting CP, një ekip futbolli me qendër në Lisbonë. Kur Cristiano Ronaldo ishte adoleshent, 15 vjeç, u diagnostikua me një çrregullim në zemër. Për fat të mirë, gjendja u rregullua përmes operacionit me lazer.

Në vitin 2003, Manchester United pagoi 12 milionë paund për Ronaldon. Ai ishte lojtari i parë portugez që hyri në Manchester FC.

Kur shkoi për herë të parë te Manchester United, ata i dhanë fanellën me numrin shtatë. Ky ishte një presion i madh, sepse vetëm yjet e mëdhenj si David Beckham e kishin veshur atë numër për skuadrën e Manchesterit më parë. Por siç e dimë të gjithë, Ronaldo provoi se e meritonte nderin e numrit 7.

Figura e tij është aq e adhuruar, po aq edhe e kritikuar. Por flasim njëherë për gjërat e mia.

Ronaldo udhëtoi vetë për në Indonezi për të ndihmuar viktimat e cunamit shkatërrues të vitit 2004 pasi qarkulloi një foto e një të mbijetuari të ri që mbante veshur fanellën e tij. Thuhet se pagoi edhe për edukimin e të riut. Kur u intervistua në lidhje me përfshirjen në kaq shumë bamirësi, Ronaldo u përgjigj: "Unë nuk do ta ndryshoj botën. Ju nuk do ta ndryshoni botën. Por ne mund të ndihmojmë - të gjithë mund të ndihmojmë.”

Ronaldo është shumë i përfshirë në një organizatë të quajtur FIFA 11 For Health, e cila ndihmon fëmijët me kushte mjekësore që nuk kanë qasje në kujdesin e duhur.

Ronaldo nuk ka tatuazhe dhe refuzon t’i bëjë sepse dhuron rregullisht gjak. Udhëzimet e Kryqit të Kuq thonë se një njeri duhet të dhurojë gjak të paktën katër muaj pas kryerjes së një tatuazhi. CR7 ka dhuruar palcën e kockave për të ndihmuar djalin e futbollistit portugez Carlos Martins.

Cristiano Ronaldo kërcen në ajër më shumë se mesatarja e basketbollistëve të NBA-së dhe ndan rekordin e tij me cheetah, kafsha më e shpejtë në botë. Ai ka shënuar rekordin për vrapimin më të shpejtë – 92 metra për 10 sekonda, me një shpejtësi prej 33.12 km/orë.

Ronaldi e ka quajtur veten hapur si “lojtari më i mirë në botë” në shumë raste, gjë për të cilën jo pak njerëz e kritikojnë duke e quajtur arrogant. Kritikave u është përgjigjur duke thënë se nëse do t’i mungonte ky vetëbesim, nuk do të ishte ai që është.

Madje ka thënë se e kanë inat sepse është “i pasur, i pashëm dhe i talentuar”. Një fjali kaq arrogante, por njëkohësisht e vërtetë sepse nuk ke si ta kundërshtosh. E drejtë, Cris.

Futbollisti adhurohet sot nga fansa të futbollit dhe jo vetëm, pa dallim moshe a gjinie. Jo më kot u bë i pari njeri që arriti 200 milionë ndjekës në Instagram. Momentalisht ka 259 milionë.

Në vitin 2016 dhe 2017, ai u rendit nga Forbes si sportisti më i paguar në botë, ndërsa Time e ka renditur si një nga njerëzit më me ndikim në botë. CR7 ëshë futbollisti i parë që fiton $1 miliard në karrierën e tij.

CR7 ka katër fëmijë. Djali i parë, Cristiano Jr. lindi në vitin 2010. Ai deklaroi se ka kujdestarinë e plotë të fëmijës dhe nuk do ta zbulonte publikisht identitetin e të ëmës sipas një marrëveshjeje. Në 2017-n u bë baba i binjakëve Eva dhe Mateo, të lindur përmes një nëne surrogate. Që prej 2017-s është në një lidhje me modelen spanjolle Georgina Rodríguez, e cila në nëntor 2017 solli në jetë vajzën e tyre, Alana Martina.

Burimet: Great Performers Academy, The National News, Time, Forbes dhe Factinate.