Me mbylljen e bareve dhe klubeve të natës dhe anulimin e grumbullimeve masive, si koncertet, ishte e pashmangshme që muzikantët të mos prekeshin nga pandemia. Megjithatë në një situatë kur njerëzit presin me padurim nisjen e eventeve, si festivalet, duket se ka një interes të artistëve për sjellë projekte muzikore. Spektakli i radhës është “Kënga Magjike”, që nis së shpejti.
“Interesimi i artistëve për festivalin magjik na ka prekur. Edhe pse në një situatë pa aktivitete, përsëri dëshira për të investuar për dashurinë e tyre – këngën, është impresionuese,” u shpreh producenti Ardit Gjebrea në Instagram.
“Ndaj në shenjë mirënjohjeje, produksioni i Këngës Magjike ka vendosur që për çmimin e parë të festivalit të japë 500,000 lekë, ndërsa për 19 finalistët e tjerë, nga 200,000 lekë.”
Gjebrea e cilësoi vendimin si një “solidaritet me artistët, për të mbajtur në këmbë magjinë e këngës shqipe.”
“Kënga Magjike”, e cila u anulua për vitin 2020, do të fillojë në mars të këtij viti. Si zakonisht, faza e parë prezantuese do të jetë te “E diela shqiptare”, ndërkohë që finalja më 29 maj. Në janar 2020, Gjebrea u shpreh: “Kënga Magjike në 2020-n – pushim. “Në pranverën e 2021-shit, rikthehemi për t’u dhënë jetë hiteve të verës, për më shumë ritëm dhe ngjyra!
Postimi i producentit i gjeti të papërgatitur ndjekësit besnikë të “Këngës Magjike”, por sidoqoftë ishte një vendim i mirëmenduar për shumë arsye.
