Angela Merkel, e para kancelare femër e Gjermanisë, është gruaja më e fuqishme në botë. Ajo e mban këtë status që prej vitit 2006, me përjashtim të vitit 2010, kur u zëvendësua përkohësisht nga Zonja e Parë e SHBA-së asokohe, Michelle Obama. Pavarësisht se Angela njihet gjerësisht, si udhëheqësja e vendit që drejton ekonominë europiane dhe politikania që ka udhëhequr më gjatë në Europë, disa fakte rreth jetës së saj jo shumë njerëz i dinë.
Emri
Angela Merkel u rrit me emrin Angela Kasner dhe familja e të atit është pjesërisht me origjinë polake. Merkel është mbiemri i bashkëshortit të parë, një student fizike, me të cilin u martua në vitin 1977 dhe u divorcua katër vjet më vonë.
Fëmijëria
Babai i saj ishte një zyrtar në kishën Luterane. Ai u largua nga Gjermania Perëndimore në Gjermaninë Lindore të kontrolluar nga Sovjetikët, pak pasi lindi Angela, ndonëse mijëra të tjerë po zhvendoseshin në anën tjetër. Qëndrimi i disiplinuar dhe i kujdesshëm i Merkel ndaj politikës shpesh lidhet me edukimin e saj në Gjermaninë Lindore.
Pseudonimi
Përkrahësit gjermanë e quajnë Mutti, që do të thotë “Mami”.
Ana tjetër e saj
Merkel punonte si banakiere në diskotekat ku bëheshin festat e kolegjit.
Shkenca
Angela Merkel ka një diplomë në Fizikë dhe një doktoraturë në Kimi Kuantike dhe thotë se suksesi si politikane vjen nga qasja e saj shkencore dhe analitike ndaj situatave. Ajo ka punuar si shkencëtare kërkimore, si e vetmja grua në seksionin e kimisë teorike në Akademinë e Shkencave të Gjermanisë Lindore.
Lëvizja e zgjuar
Në fund të viteve 1970, Merkel aplikoi për të punuar si asistente në një shkollë inxhinierike dhe iu kërkua të bashkohej me Stasi (policia sekrete e Gjermanisë Lindore.) Ajo thotë se nuk pranoi, duke pretenduar se do të bëhej spiune. Sikur ta kishte pranuar, karriera e ardhshme në politikën gjermane do të ishte e pamundur, sipas një analize në Bloomberg BusinessWeek. Shumë politikanë janë detyruar të japin dorëheqjen për shkak të së kaluarës në Stasi.
Kriza e jetës
Kur Merkel u divorcua nga bashkëshorti i parë (1982), jetoi në një apartament të paligjshëm pranë stacionit të trenit në Friedrichstrasse. Në ditëlindjen e 30-të, i ati i shkoi për vizitë duke i thënë: “S’ja ke dalë mbanë”.
Disiplina
Pas rënies së Murit të Berlinit, Merkel u bashkua me partinë politike të Bashkimit Demokristian (CDU). Më vonë, ajo u emërua në kabinetin e Helmut Kohl si ministre për gratë dhe të rinjtë dhe më vonë shërbeu si ministre për Mjedisin dhe Sigurinë Bërthamore. Natën kur ra Muri i Berlinit, në nëntor 1989, 35-vjeçarja Merkel shkoi në sauna. Më vonë, ajo u end përtej kufirit duke festuar me të huajt, duke pirë birrë dhe shkoi në shtëpi që të mos lodhej të nesërmen në punë. Pothuajse të gjithë të tjerët në Gjermani, ishin jashtë gjatë gjithë natës.
Bashkëshorti
Bashkëshortit të saj, Joachim Sauer, një profesor në Universitetin e Berlinit, nuk i pëlqen të jetë në qendër të vëmendjes, sa nuk u shfaq as në inagurimin e Merkelit si kancelare në vitin 2005. Ai preferon të udhëtojë me kompani ajrore me kosto të ulët, edhe në rastet kur mund të udhëtojë me Merkel.
Talenti sekret
Merkel thotë se është kuzhiniere shumë e aftë, bën tortë me kumbulla dhe shkon për pazar rregullisht në supermarket, ku paguan me para. Ajo i tha ish-presidentit nigerian, Goodluck Ebele Jonathan, se çdo mëngjes i përgatit bashkëshortit mëngjesin.
Frika sekrete
Angela Merkel i ka frikë qentë, pasi njëri e kafshoi në vitin 1995. Vladimir Putin i ka përdorur shpesh ata si një mënyrë për ta frikësuar Merkel, referuar raportimeve nëpër media.
Dashuria për futbollin
Merkel i viziton shpesh dhomat e zhveshjes së ekipit gjerman pas ndeshjeve për t’u uruar fitoret. Një herë, pa Bastian Schweinsteiger lakuriq aksidentalisht.
Burimet: Time, Forbes, Britannica, Biography, Inc.
