Lana Del Rey mendon se Donald Trump është thjesht "reflektimi i problemit më të madh që ka bota jonë".
Gjatë një interviste të fundit për BBC Radio 1, këngëtarja e pyetur se si e përballoi 2020-ën, tha se gjithnjë kishte menduar se diçka e tillë si kjo pandemi do të ndodhte shpejt.
"Unë jam shumë fataliste. Trembem shpejt, prandaj e kisha menduar që diçka e tillë do të ndodhte."
Këngëtarja gjatë deklaratës së saj foli edhe për situatën aktuale politike në SHBA, duke e quajtur "çmendurinë e Trump-it" si të nevojshme për të ndodhur.
"Çmenduria e tij, sado e keqe është, duhet të ndodhte. Ne na duhej një reflektim i problemit më të madh të botës, që nuk mendoj se është ndryshimi i klimës, por narcizmi dhe sociopatia. Veçanërisht në Amerikë, ky problem do ta vrasë botën. Nuk është kapitalizmi, është narcisizmi. Isha e surprizuar që s'kishim një personazh televiziv psikopat dhe të çmendur për president shumë kohë më parë sepse kjo është ajo që shohim në TV dhe Instagram gjithë kohës. Shumë "blogerë" të fiksuar pas vetes...Nuk po them që nuk ka nga ata që janë të lezetshëm, apo që me të vërtet të mësojnë diçka dhe ndikojnë tek jeta jote."
Del Rey shtoi se përveç numrit të tmerrshëm të vdekjeve, pandemia dhe ngjarjet e fundit kanë qenë një thirrje për zgjim.
"Jeta nuk është lloji i këpucëve që ble, nuk është studimi në Harvard apo Oxford, është lloji i njeriut që je."- vazhdoi ajo.
Përsa i përket ngjarjes së fundit në Capitol, Lana u shpreh se Trump as nuk e ka ditur se çfarë ishte duke nxitur me fjalët e tij sepse ai vuan nga deliri i madhështisë.
Gjithsesi, pas atij icidenti me pasoja tragjike, sipas saj njerëzit do të jenë më të qartë për çfarë do të ndodhë në vazhdim.
