17-vjeçarja JoJo Siwa iu përgjigj reagimeve të një loje për fëmijë me emrin e saj, që përmbante pyetje si:

“A keni parë ndonjëherë padashje një njeri nudo ose a ju ka parë ju ndonjëherë dikush lakuriq?”

Ylli i YouTube hodhi një video në rrjetet e saj sociale dhe tha se nuk e kishte idenë se çfarë lloj pyetjesh ishin përfshirë në letrat e lojës, sepse “kur kompanitë i bëjnë këto lojëra, ata nuk drejtojnë çdo gjë nga ajo”.

Loja me markën e Nickelodeon, e cila tregtohet për fëmijët e moshës 6 vjeç e lart, përfshin një lojë me letra në kategorinë “Truth or Dare” (E vërtetë apo sfidë) me pyetje të tilla si:

“A keni dalë ndonjëherë në rrugë pa mbathje? Rrobat e banjës nuk llogariten.”

Apo: “A jeni arrestuar ndonjëherë?”

Pasi prindërit filluan të shprehnin shqetësimet e tyre rreth lojës, JoJo tha se ishte “vërtet e mërzitur” për përmbajtjen e saj dhe se po punonte për ta hequr nga gjithë pikat e shitjes.

Nickelodeon dhe Spin Master, që prodhuan lojën, publikuan një deklaratë të përbashkët për CNN, ku konfirmonin se “loja po tërhiqej nga raftet”.

"Ne e respektojmë dhe vlerësojmë marrëdhënien që JoJo Siwa ka me ndjekësit e saj dhe i marrim shumë seriozisht shqetësimet e ngritura në lidhje me lojën. Ajo nuk po prodhohet më dhe ne kemi kërkuar që shitësit me pakicë të heqin çdo produkt që ka mbetur nga raftet e tyre.”