Vlashent Sata dhe Dojna Mema nuk e kanë fshehur kurrë vlerësimin dhe raportin e ngrohtë me njëri-tjetrin, ndonëse lidhjen nuk e kishin konfirmuar në mënyrë të drejtpërdrejtë. Gjithsesi një postim i artistit në Instagram konfirmoi se po, ai dhe Dojna janë bashkë.

Vlashenti nuk është një emër i panjohur në Shqipëri, përkundrazi është përfolur vazhdimisht për muzikën e mirë dhe lidhjen e fortë që ka me komunitetin, sidomos ata në nevojë, megjithatë nuk është nga ata këngëtarët që njihet në masë dhe fundja s’ka pse pasi qartazi ai nuk e synon.

Sot është këngëtar, tekstshkrues dhe kompozitor. Me muzikën nisi të merrej që në moshë fare të vogël, diku te 5-6 vjeç, nxitur nga i ati, muzikologu i njohur Loro Sata. Vazhdoi studimet në Francë, vend ku ndan një pjesë të jetës së tij. Detajet në vijim do t’ju njohin më shumë me të dhe sigurisht do të kuptoni se është artisti (dhe i dashuri) i përsosur.

Lidhja me komunitetin dhe bamirësitë

Vlashenti ka një lidhje të fortë me njerëzit dhe vazhdimisht e përdor muzikën e tij që të kontribuojë sa të mundet. Përmendim këtu se në vitin 2016, organizoi një koncert recital “Hana e plotë” ku performoi 12 këngët e albumit të tij, “Hana”. Të gjithë të ardhurat e koncertit të mbajtur në Shkodër shkuan për fëmijët jetimë. Në dhjetor të një viti më parë, së bashku me Elina Dunin, organizuan një koncert recital për fëmijët me sindromën Down.

Tekset

Tekset e tij janë poezi, janë të ndjera, sjellë përmes një gegërishteje të ëmbël.

“E shoh unë shoh unë qiellin plot
Mbushun me balonat tona
T’lira tuj flutru larg, te andrrat tona.
Veç mall kam mall për ju o shokë
Pranë ju du, me kenë bashkë me na mjaftu,
Njat hajgare t’vejtër me tregu,
Jena na fmitë qe s’kena me u rrit...” – Kënga “Djemtë e Balonave”.

Ja një copë nga “Copëzat”, dedikuar Dojnës me vetë Dojnën në videoklip:

“[...] Sa herë t'shikoj n'sy qeshesh ti si dielli ma i ngrohtë
e plotë, e vogla ime, e plotë je e madhe sa nje Botë,
e mos dysho në vete mos dysho kot,
se copëzat e tua t'kanë ba ça je ti
se copëzat e tua t'kanë ba kush je ti, sot...”

Merrni një gotë verë kur e dëgjoni.

Flet kaq bukur për dashurinë

Në një intervistë për Anabel në vitin 2011, ai e përshkroi vajzën e ëndrrave kështu: “Mendoj se vajza tipike e “ëndrrës sime” do të ishte një njeri i thjeshtë dhe e veçantë, me sytë plot me jetë, me ëndrra plot, me zemër fëmije e me forcën për t’ia dalë vetë në jetë. Me pak fjalë, njeriu i përsosur!” (Fiks Dojna, e dimë).

Adhuron natyrën shqiptare dhe kafshët

Vishet këndshëm dhe ndryshe

“Stili im nga Shqipëria në Francë ka ndryshuar disi, sepse më ka ndryshuar edhe mosha. Isha akoma adoleshent kur jeta ime ishte kryesisht vetëm në Tiranë dhe më pëlqente shumë e zeza asaj kohe; të kisha kitarën mbi sup, flokët e gjata të kapura...Në Paris më mungonte dielli në buzëqeshjet e njerëzve dhe mbi çatitë e pallateve e kështu më pëlqente ta kompensoja me ngjyrat që nisa t’i përdor në veshje,” tha ai për Anabel. Tani, Vlashenti i është rikthyer të zezës sepse qartazi kalon më shumë kohë në Tiranë.

Është i përkushtuar

“Unë personalisht do t’i sugjeroja [një djali që në takimin e parë me një vajzë] t’i bënte një dhuratë të vogël e të këndshme! Ndonjëherë, të mendosh për të tjerët, është frytdhënëse dhe pasuri për vete.”

Bonus: Kimia me Dojnën!