Për vite me radhë, moda e rrugës është kthyer drejt tonaliteteve neutrale dhe luksit të heshtur. Minimalizëm, bezhë, gri, të bardha e të zeza; të gjitha kanë vendin e tyre dhe pa dyshim janë elegante. Por, kur u trembëm kaq shumë nga ngjyrat?
Të veshësh një nuancë të fortë nuk do të thotë të humbasësh stilin. Përkundrazi, disa nga kombinimet më të freskëta të këtij sezoni vijnë pikërisht nga paleta ngjyrash që askush nuk i mendon bashkë.
Dhe jo, nuk ka më “rregulla” të modës: rozë dhe e kuqe mund të shkojnë bashkë; blu e errët dhe e zeza janë fantastike nëse kombinohen siç duhet; dhe ngjyrat që dikur konsideroheshin “konflikt” tani janë sinjal stili. Më poshtë, gjej 5 kombinime ngjyrash që do ta freskojnë garderobën tënde këtë vjeshtë.
1. E verdhë e butë + blu kobalt
Kombinimi që të kujton rrezet e diellit dhe qiellin e natës. E verdha pastel është ende trend, edhe kur temperaturat bien. Shoqëroje me një xhaketë blu të thellë për të krijuar kontrast dhe elegancë vjeshtore.
2. Jeshile fëstëku + rozë salmoni
Ngjyra e fëstëkut është mbretëresha e këtij viti. Kombinoje me një ton të butë rozë që të kujton lëkurën e pjekur nga dielli.
3. E kuqe në portokalli + vjollcë e butë
Pasteli i vjollcës duket si ftesë për pranverë, por kur kombinohet me të kuqe të ndezur, kthehet në një pamje guximtare e delikate njëkohësisht. Ideale për një takim pas pune ose darkë me shoqet.
4. Gri + karamel
Pse të mos i përziesh? Këto dy ngjyra krijojnë një efekt super elegant dhe të sofistikuar kur vishen bashkë. Është një kombinim që thotë “jam e zonja” pa e thënë me zë të lartë.
5. E kuqe qershi + Jeshile ulliri
Jo, nuk po flasim për atmosferë Krishtlindjesh! Kur zgjidhen nuancat e duhura, qershi dhe ulli, kjo dyshe ngjyrash bëhet më shumë “modë franceze” sesa “festë fundviti”. Dhe kur i shton edhe nuanca gurësh të çmuar si blu e thellë apo lejla e errët? Magjike.
