Pas transmetimit të mini-serialit “Dashuria nuk vret”, krijuar nga Anabel Entertainment me Nilor Film në kuadër të fushatës se Un Women dhe Anabel Media kundër dhunës me bazë gjinore, shumë ndjekëse ndanë me ne historinë e tyre të dhunës në marrëdhënie dhe si zgjodhën të hiqnin dorë nga një raport i tillë.

1.

“Para një muaji ia dola të dilja nga një lidhje toksike dhe sa herë shoh këtë mini-serial, shoh veten time dhe atë. Kam provuar komisariatin, faljen, shpresën dhe asnjëherë nuk ndalova së dashuri. Qëndrova plot 4 vite me të; kam ngrënë bukë e lot. E di ç’më ndodhi njëherë? U zgjua nga gjumi dhe më kishte parë në ëndërr me një djalë tjetër dhe në momentin që shkova t'i thoja ‘Mirëmëngjes’, më goditi e më tha të zhdukesha sepse sipas tij unë e tradhtoja.

Nuk më linte të shihja filma ku më pëlqente aktori kryesor. Nuk më linte të dilja me familjen. Shoqëria ime u zhduk nga lista. Gjithmonë e falja me shpresën se do e kuptonte që ishte ai gabim dhe jo unë.

Unë isha thjesht e zeza e vetes që isha verbuar komplet. Edhe kur i fala tradhtinë, shprehej se e kisha falur për t’u hakmarrë.

Së fundmi, makthi dhe horrori mbaroi. Tani, edhe pse truri im është goxha i lodhur, po përpiqem të jetoj normal, të bëj një jetë normale, të rifitoj e të rikthej afër vetes sa më shumë gjëra të humbura, përfshirë edhe njerëz.”

2.

Sapo pashë pjesën e dytë të ‘Dashuria nuk vret’, momenti kur i përplas kokën në makinë, realisht kam qarë sepse kam qëndruar shtatë vite në një lidhje dashurie abuzive psikologjikisht dhe fizikisht. Kam qëndruar në këtë marrëdhënie abuzive dhe e kisha pranuar fatin tim.

M’u desh të humbja një fëmijë në muajin e 6 të shtatzënisë që ta kuptoja. Theksoj që jam vajzë e lindur dhe rritur në Durrës, e shkolluar në një nga degët më të mira sot për sot, e punësuar shumë mirë. “Edhe me 10 fëmijë të më vish në shtëpi, do të pres se je fëmija im” më thoshte im atë.

Rigjeta kurajon për të jetuar e sot kam vajzën 2 vjeç me një bashkëshort të rrallë që më respekton dhe dashuron.”

3.

“E kam parë mbi 10 herë 'Dashuria nuk vret'. Më kujton një realitet timin shumë të hidhur. Edhe pse më thonin të gjithë të duroja, përfshirë edhe nëna ime, sepse “burrat kështu e kanë”, arrita të ikja nga ajo lidhje shkatërrimare, pa ndihmën e askujt. Ishin katër vitet më të errëta të jetës sime.

Vetëm kur mbaron gjithçka kupton sa shumë je poshtëruar.”

4.

“Kam qarë me përfundimin e ‘Dashuria nuk vret’. Pas 10 vitesh martesë, bëra dhe unë një gjë të tillë edhe pse kam qarë 1 vit rresht sepse mendoja se i shkatërrova jetën vajzës sime, i prisha familjen. Por sot ajo është 20 vjeç, më e lumtur se kurrë. Nuk është kurrë vonë të dalësh nga një marrëdhënie e dhunshme. Nëse keni fëmijë, besomëni që do të jenë më të lumtur.”

Seritë e “Dashuria nuk vret” i gjeni këtu.