Teksa bizneset e vogla dhe shitësit lokalë përballen me bllokime dhe kufizime, gjigandët e tregtisë elektronike si Amazon kanë arritur në miliarda fitime shtesë. Kjo pabarazi në rritje, e sjellë nga pandemia, nxiti një grua kanadeze të provojë të luftojë.
"Unë thjesht e urrej [faktin se] Jeff Bezos dhe Amazon po bëjnë miliarda nga kurrizi i njerëzve të klasës punëtore", tha Ali Haberstroh. "Më duket se ata po vendosin paratë përpara mirëqenies së njerëzve."
Haberstroh e ktheu zemërimin e saj në “Not Amazon” (Jo Amazon), një dritare e re për bizneset e pavarura kanadeze, e cila rendit gati 4,000 shitës me pakicë në Toronto, Halifax, Calgary dhe Vancouver.

Më shumë se 350,000 njerëz kanë vizituar faqen, e cila jo vetëm që ndihmon pronarët e dyqaneve, por tregon zhgënjimin në rritje për ndikimin e kompanive gjigante në internet.
"Në fillim nisi si shaka, me emrin, por së shpejti doja vërtet ta bëja si Amazon, duke pasur gjithçka në një vend. Unë nuk doja që njerëzit të kishin një justifikim për të mos blerë te bizneset lokale."
Ajo bleu domain-in Not-Amazon.ca për 2,99 dollarë kanadezë. Shumë dyqane, të cilat më parë rrezikonin të falimentonin, kanë patur shitje që kur u vendosën në Not Amazon. Vetë modeli i biznesit e mundëson këtë. Pronarët e Green Jar, një dyqan furnizimesh shtëpie dhe pastrimi me seli në Toronto, thanë se shitjet në internet janë rritur më shumë se 500% që kur janë të listuar në Not Amazon.
"Pritja nga bizneset ka qenë absolutisht e mahnitshme. Kam marrë mesazhe që më bëjnë të qaj çdo ditë."
Burimi: Guardian