Vrasja e 25-vjeçarit Klodjan Rasha pas qëllimit me armë prej efektivit të policisë, ka shkaktuar revoltë, panik dhe pasiguri tek njerëzit ndaj autoriteteve. Për herë të parë, Policia e Shtetit ka reaguar në lidhje me ngjarjen e rëndë, duke i siguruar qytetarëve se e gjithë ngjarja do të zbardhet në detaje.
"Në emër të punonjësve të Policisë së Shtetit, të prekur nga ngjarja e rëndë që ndodhi një ditë më parë në Tiranë, e cila përfundoi me vrasjen tragjike të të riut Klodjan Rasha, i shprehim ngushëllimet më të sinqerta familjarëve, miqve, të afërmve dhe qytetarëve të lënduar nga ky akt.
Pas ngjarjes së ndodhur, krahas hetimeve të nisura nga organet e pavarura, për zbardhjen e plotë të rrethanave të ngjarjes, strukturat përgjegjëse në Policinë e Shtetit po analizojnë në mënyrë intensive të gjithë shkaqet, veprimet, mosveprimet apo faktorë të tjerë që çuan në incidentin fatal."- shkruhet ndër të tjera në deklaratën e publikuar në faqen zyrtare.
Klodjan Rasha u qëllua me armë zjarri mesantën e të shtunës, nga efektivi i policisë, pasi nuk ju bind urdhrit të tij për të ndaluar, me pretendimin se kishte shkelur orën policore.
Vdekja tragjike e 25-vjeçari ka ngjallur pakënaqësi tek qytetarët të cilët kanë nisur protestat që dje dhe pritet t'i vijojnë pasditen e sotme përballë Ministrisë së Brendshme.
