Teksa shumë laboratorë nëpër botë janë duke u përpjekur të prodhojnë një vaksinë kundër Covid-19, rezulton se kompanisë farmaceutike amerikane Moderna iu deshën vetëm dy ditë për të dizenjuar propozimin e saj.
Kujtojmë se prej më shumë se tre dekadash, ekipet shkencore përpiqen të krijojnë një vaksinë kundër një koronavirusi dhe fakti që kompania e dizenjoi një të tillë për dy ditë, e bën atë të jetë një nga përparimet shkencore më të mëdha të dekadës.
Vaksina e Moderna-s përdor teknologjinë mARN dhe bazohet te ARN-ja mesazhere, një pjesë e acidit ribonukleik që mbart informacion në lidhje me sekuencën e aminoacideve të një proteine specifike nga ADN-ja. Në terma të thjeshtë, mund ta shohim mARN si një pajisje USB të cilën qelizat e përdorin për të kaluar informacionin nga kompjuteri (ADN) në një pajisje tjetër, si printeri (ribozom). Kështu, ata mund të mashtrojnë ribozomet dhe t'i bëjnë të prodhojnë proteinat që duam.
Ndërsa vaksinat e tjera marrin informacion gjenetik nga një virus dhe e kultivojnë atë në një qelizë njerëzore, metoda mARN thjesht kërkon kodin gjenetik të virusit, duke shkurtuar kështu procesin e prodhimit.
Kjo teknologji është baza për dy nga vaksinat më të përparuara: Moderna dhe Pfizer. Prandaj, nëse laboratorët e tyre janë të suksesshëm, arritja do të jetë shumë më e madhe sesa vetëm parandalimi i Covid-19. Këto kompani do të testojnë fuqinë e teknologjisë për të ndryshuar mjekësinë dhe industrinë farmaceutike.
Vaksina e Moderna-s ishte 94.5% efektive, ndërsa e Pfizer 95%, sipas rezultateve të fazës 3.
Burimet: Entrepreneur, New York Times
