“Galeritë janë miniera që punojnë burrat. Ndoshta kur je brenda ajo shembet dhe të zë poshtë. Më ka marrë malli për babin. Unë do doja t’i thoja që e dua shumë dhe që do të mësoj shumë në shkollë”. Kështu e nis Flori rrëfimin e tij. Ai është djali i Rexhep Rushitit, 33-vjeçari i cili ditë më parë humbi jetën në një galeri kromi të mbyllur.

Gjatë verës Rexhepi punonte duke mbledhur bimë medicinale në mal. Ai kishte pësuar disa aksidente në miniera dhe e njihte rrezikshmërinë e tyre. Pak muaj më parë, mori 800 mijë lekë borxh me të cilat bleu një kalë për të punuar, por kali ngordhi pak kohë pasi e morën dhe Rexhepi u detyrua t’i kthehej punës në galeri për të shlyer borxhin dhe për të mbajtur familjen.

“Kishte shkuar për të punuar, por se çfarë do të ndodhte unë nuk e dija. Nuk di çfarë të bëj tani. Pa punë, pa gjë, dritat pa paguar, uji duhet paguar… shtëpinë siç e patë vetë [është] copë-copë,” tha bashkëshortja Irena.

Irena është 29-vjeçe dhe sot gjendet krejt e vetme në rritjen e 3 fëmijëve të mitur të mbetur jetimë. Vuan nga disa probleme me shikimin, por asnjëherë nuk është vizituar.

Familja Rushiti merr vetëm një ndihmë ekonomike dhe është e zhytur në borxhe. Kushtet ku Irena dhe fëmijët jetojnë janë të mjerueshme. Për të ndihmuar sadopak, klikoni këtu.