Situata e Covid-19 në vend dhe kryesisht në kryeqytet duket se ka dalë jashtë kontrollit. Ekspertët, e cilësojnë Tiranën si zonë të kuqe, pasi deri tani ka rreth 175 vatra të Covid-19.
Shefi i Urgjencës, Skënder Brataj i ka bërë thirrje qytetarëve të ndërgjegjsohen, pasi në të kundërt as vendi ynë nuk i shpëton karantinës së pjesshme e cila po aplikohet në shumicën e vendeve fqinjë dhe Europë.
“Infeksioni është shpërndarë në një masë shumë të madhe. Patjetër që masa do të ketë sepse me këto përmasa që po merr sëmundja, detyrimisht duhet që të kufizohen. Nëse nuk kontrollohen duhet që të merren masa. Nuk po respektojnë masat. Hapja e shkollave ishte një riskoze dhe vazhdon të jetë. Lokalet në darkë dhe çfarëdo lloj qofshin janë bërë një strehë për të mos mbajtur maskën, për mos respektimin të distancës dhe as të kufizimit të infeksionit."- u shpreh Brataj për Tv Klan.
Ai shtoi se të rinjtë janë grupmosha më e prekur nga Covid-19 për momentin. Nga 1300 thirrje të regjistruara në urgjencën kombëtare dy javë më parë, tani numri ka arritur në 3000 brenda 24 orëve.
Nga ana tjetër, edhe zëvendësministrja e Shëndetësisë Mira Rakacolli pohoi për Euroneës.al se situata mbetet shqetësuese dhe një nga shkaktarët e gjendjes mbetet papërgjegjshmëria e qytetarëve. A do të ketë një karantinë të dytë për përballimin e gjithë kësaj?
Sipas Rakacollit, për momentin nuk ka asnjë skenar konkret që planifikon mbylljen.
“Është një situatë shqetësuese, sepse numrat po vijnë në rritje. Kjo situatë ka të bëjë me sjelljen e virusit në këtë stinë vjeshtë-dimër, por ka të bëjë edhe me atë se qytetarët nuk po i respektojnë masat, sidomos në këtë periudhë të rritje së rasteve. Ne jemi duke ndjekur me shumë vëmendje situatën. Problemi i shëndetit është problem kompleks, që është i lidhur me ekonominë, por edhe me problemet e tjera sociale. Ne nuk duam të mbyllemi krejtësisht siç bëmë në fillim. Këtë nuk e duam as ne dhe as qytetarët. Që në mos të arrijmë këtu nuk e kemi në dorë ne, por këtë e kanë në dorë qytetarët.Të përdoret maska me shumë dëshirë. Njerëzit nuk e mbajnë maskën në mënyrë korrekte, vazhdojnë të qëndrojnë me orë të zgjatura në bare e restorante dhe nuk ruajnë distancën."
Sipas saj, vendimi për një mbyllje të dytë të pjesshme e japin shifrat.
"Shifrat janë të larta dhe po rriten ndjeshëm, po rritet numri i të shtruarve, numri i vdekjeve në përputhje me numrin e të shtrimeve nuk po rritet me proporcionalitet. Një analizë e tyre e kombinuar do na detyrojë që të marrim ato masa në uljen e rasteve, por do jenë masa të mirëmenduara. Në këtë moment që po flasim jo. Gjithçka varet nga situata dhe ne jemi në 24/7 ditë të javës në monitorim të situatës. Nuk kemi mbyllje të universiteteve, por mësim online. Universitetet nuk u hapën, jo se u mbyllën."- përfundoi ajo.
Burimi: Tv Klan, Euronews.al
