Për shkak të rritjes së votimit postar, disa shtete, duke përfshirë Nevadën dhe Pensilvaninë, mund të mos e përfundojnë numërimin e votave presidenciale ditën e sotme.
Çfarë ndodh zakonisht? Zgjedhjet presidenciale të SHBA-së nuk fitohen nga vota popullore kombëtare. Fituesi në secilin shtet mbledh votat e kolegjit elektoral - dhe i duhen gjithsej minimumi 270 për të marrë Shtëpinë e Bardhë.
Çfarë po ndodh aktualisht? Kryesisht për shkak të pandemisë së Covid-19, një numër i madh i votuesve - rreth 68%, krahasuar me 34% në vitin 2016 – votuan më herët, përfshirë edhe votimin përmes postës. Numërimi i votave postare është më i ngadaltë sepse nënshkrimet dhe adresat e votuesve duhet të kontrollohen. Disa shtete e fillojnë këtë proces verifikimi shumë përpara ditës së zgjedhjeve, por disa shtete të tjera nuk e lejojnë.
Për cilat shtete kyçe po flitet? Votimi nuk ka përfunduar ende në pesë shtete: Alaskë, Xhorxhia, Nevada, Karolina e Veriut dhe Pensilvani. Associated Press, madje edhe Fox News, kanë shpallur fitues Joe Biden në Arizona.
Çfarë tjetër po i komplikon çështjet? Afërsisht gjysma e të gjitha shteteve do të pranojnë votat postare që kanë mbërritur pas ditës së zgjedhjeve për sa kohë që ato mbajnë vulë postare jo më vonë se data 3 nëntor. Raportohet se ka pasur gjithashtu një rritje të numrit të njerëzve që kërkuan një votim postar, por më pas vendosën të shkonin personalisht në qendrën e votimit. Këtyre u duhet një kontroll i kujdesshëm për t'u siguruar që askush nuk ka votuar dy herë.
E panjohura e madhe: Rezultati i diskutueshëm
Në garën e vitit 2000, kandidati demokrat, Al Gore, e humbi Floridën me vetëm diçka më shumë se 500 vota nga një total prej gati 6 milionë, gjë që i kushtoi zgjedhjet. Pas një rinumërimi të diskutueshëm dhe një vendimi të Gjykatës Supreme, George W Bush u shpall fitues.
Trump dhe fushata e tij këtë javë kanë kërkuar ndalimin e numërimit të votave në Pensilvani dhe Xhorxhia, për të cilat Associated Press (AP) nuk ka shpallur një fitues. Fushata e Trump ka kërkuar gjithashtu një rinumërim në Uiskonsin, ku AP ka shpallur Biden fitues. Nuk ka asnjë provë që betejat ligjore të fushatës do të kenë ndikim në rezultatin e zgjedhjeve.
Burimet: Guardian, USA Today
