Joe Biden është 6 vota larg të qenurit president i Shteteve të Bashkuara të Amerikës. Me fitoren e tij në shtete kryesore si Miçigan dhe Uiskonsin, Biden ka siguruar 264 vota në kolegjin elektoral, nga 270 që nevojiten për t’u shpallur fitues. Kandidati demokrat duhet të fitojë vetëm në një shtet për t’u vendosur në krye të Shtëpisë së Bardhë. Ndërkohë Donald Trump ka siguruar 214 vota.
Numërimet vazhdojnë ende në Pensilvani, Xhorxhia dhe Arizona. Trump ka një avantazh në Pensilvani dhe Xhorxhia. Associated Press dhe organizata të tjera të lajmeve, përfshirë rrjetin konservator Fox News, shpallën Biden fitues në Arizona – një fitore e madhe për demokratët në një vend që ka qenë tradicionalisht republikan.
Ndërkohë presidenti aktual paralajmëroi se do të nisë procese gjyqësore për të ndaluar numërimin e votave në Pensilvani dhe Xhorxhia. Mbështetës të Trumpit protestuan në një vend të numërimit të votave në Detroit duke u bërë thirrje zyrtarëve të ndalojnë numërimin e votave në Miçigan, ndërsa në Phoenix, Arizona, mbështetësit e Trump kërkuan që zyrtarët të vazhdojnë numërimin e votave.
Pavarësisht rezultateve të tanishme ku Biden është në avantazh, është ende e mundur që Donald Trump të fitojë. Alaska nuk ka shpallur ende një fitues, por qartazi rezultati është në favorin e Trump. Kështu, votat e tij të kolegjit elektoral shkojnë në 217. Në mënyrë që të sigurojë 53 votat e tjera të nevojshme, Trump duhet të vitojë në Nevada (6 vota), Karolinën e Veriut (15), Xhorxhia (16) dhe Pensilvani (20).
Burimet: Associated Press, Guardian, USA Today
