Ministrja e Financave, Anila Denaj, njoftoi se përmes një bashkëpunimi ndërinstitucional është bërë e mundur rritja e pagës minimale.
“Angazhimi i qeverisë në Këshillin Kombëtar të Punës me 7 ministri është tregues i vëmendjes që kemi ndaj kërkesave të sindikatave. Bashkëpunimi ndërinstitucional në kuadër të përgjegjësisë sociale ka sjellë si rezultat rritjen e pagës minimale mbi parimin e ‘Pagës së Denjë për Punë të Denjë’.” – shkruan ajo në Facebook.
Në fjalën e saj, ministrja tha (via A2 News):
“Paga bazë minimale në shkallë vendi, e detyrueshme për t’u zbatuar nga çdo person juridik a fizik, vendas ose i huaj, propozohet të jetë 30.000 lekë në muaj nga 26.000 lekë në muaj që është caktuar me VKM nr.809 datë 26.12.2018, duke u rritur me 15.4 %, duke shtuar, se me këtë synojmë ruajtjen e nivelit të jetesës për të punësuarit si në sektorin privat dhe atë buxhetor.”
Detaje të tjera nuk janë bërë publike, por pritet që vendimi të hyjë në fuqi në vitin 2021.
