Presidenti francez, Emmanuel Macron ka njoftuar një kontroll policor gjatë natës, në Paris dhe tetë qytete të tjera në përpjekje për të frenuar përhapjen e shpejtë të koronavirusit.

Masa: Nga ora 21:00 në 6:00 do të ketë lockdown (karantinim), duke nisur nga e shtuna.

“Kjo masë do të zgjasë për të paktën katër javë”, tha Macron në një intervistë televizive.

Është shpallur edhe një emergjencë e shëndetit publik.

Ndërkohë Gjermania njoftoi se baret dhe restorantet në zonat me rrezik më të lartë duhet të mbyllen herët.

Kancelarja Angela Merkel njoftoi kufizimet e shtrënguara të mërkurën, ndërsa vendi regjistroi më shumë se 5,000 infeksione të reja për herë të parë që nga prilli.

Të enjten, ky numër u rrit përsëri, me 6.638 raste të regjistruara, shifra më e lartë ditore që nga fillimi i pandemisë.

Sipas rregullave të reja, në zonat ku infeksionet tejkalojnë 50 për 100,000 banorë, baret dhe restorantet duhet të mbyllin dyert e tyre deri në orën 23:00. Takimet private do të kufizohen në 10 persona nga dy familje.

Në të gjithë Evropën, qeveritë po vendosin kufizime të reja për të luftuar një valë të dytë të infeksioneve.

Një bllokim i pjesshëm ka hyrë në fuqi në Hollandë dhe kafenetë dhe restorantet po mbyllen.

Më parë, rajoni veri-lindor i Spanjës, i Katalonjës tha se baret dhe restorantet do të mbyllen për 15 ditë, duke nisur nga e enjtja.

Republika Çeke ka mbyllur shkollat ​​dhe baret. Ajo ka shkallën më të lartë të infeksionit në Europë gjatë dy javëve të fundit, me 581.3 raste për 100,000 njerëz.

Qeveria irlandeze njoftoi një ndalim të vizitave në shtëpi nga e enjtja.

Cilat janë masat e reja në Francë?

Masa e e përmendur më lart, do të zbatohet në Paris dhe rrethinat e tij si dhe Marsejën, Lion, Lille, Saint-Etienne, Rouen, Toulouse, Grenoble dhe Montpellier.

Duke prekur rreth 22 milion njerëz, do të aplikohet fillimisht për katër javë.

“Masat do të ndalojnë njerëzit që vizitojnë restorante dhe shtëpi private gjatë mbrëmjes dhe natës”, shpjegoi Macron.

Udhëtimet thelbësore do të lejohen. Kushdo që do të shkelë masën do të gjobitet me €135.

“Banorëve do t'u duhet një arsye e vlefshme për të qenë jashtë shtëpive të tyre gjatë orëve të ndalimit të orës”, tha presidenti, duke shtuar se ai e kuptonte që një “shtetrrethim” ishte një gjë "e vështirë" për t'u kërkuar njerëzve të bënin.

Shkollat do të qëndrojnë të hapura dhe njerëzit do të jenë akoma në gjendje të udhëtojnë midis rajoneve gjatë ditës.

Për më tepër, jo më shumë se gjashtë persona do të lejohen të mblidhen brenda shtëpive private, edhe pse do të bëhen përjashtime për familjet e mëdha, shpjegoi Macron.

Bizneset që vuajnë financiarisht për shkak të masave të reja do të kenë mundësi të marrin ndihmë shtetërore, tha ai, duke shtuar se një bllokim i dytë në të gjithë vendin do të ishte "joproporcional".

"Mesazhi që unë dua të dërgoj këtë mbrëmje është se kam nevojë për secilin prej jush, ne kemi nevojë për njëri-tjetrin, për të gjetur zgjidhje," tha presidenti. "Ne do ta kalojmë këtë së bashku."

Burimi: BBC News