Pak më parë, ministrja e Shëndetësisë, Ogerta Manastirliu njoftoi ndryshimet e radhës në lidhje me aktivitetin e bareve dhe restoranteve. Sipas Komitetit të Ekspertëve, nga 1 tetori do të rihapen baret, restorantet dhe pishinat në ambientet e brendshme.

Clube-et e natës do të vijojnë të jenë të mbyllura për shkak se është e pamundur ruajtja e distancës dhe zbatimi i kushteve higjenike siç masat kundër Covid-19 kërkojnë.

Në njoftimin e saj, Manastirliu tha se zbatimi i masave mbetet kusht i panegociueshëm, aq më tepër tani që do të lejohet frekuentimi i ambienteve të brendshme

“Të mos neglizhohet në asnjë ditë kujdesi. Periudha e vjeshtës kërkon më shumë angazhim. Gjatë këtyre muajve kemi bërë maksimumin. 

Komiteti Teknik miratoi protokollet për rihapjen duke filluar nga 1 tetori, të bareve, restoranteve dhe pishinave në ambientet e brendshme. Respektimi i rregullave është kusht i panegociueshëm, që ekonomia të mos cenohet nga kufizimet e detyruara. Do të vijojnë mbyllur, klubet e natës, pub-et dhe diskot. Policia do të inspektojnë zbatimin e masave dhe do të ndërmarrin masat në rast të shkeljes së protokolleve."