High Tech

Jetë në Afërditë? Zbulimi i rrallë në planetin 'binjak' të Tokës

Shkruar nga Anabel

15 Shtator 2020

Jetë në Afërditë? Zbulimi i rrallë në planetin

Astronomët kanë gjetur një shenjë të mundshme të jetës në Afërditë, që njihet si planeti binjak i Tokës për shkak të madhësisë së ngjashme.

Dy teleskopë në Hawaii dhe Kili panë shenjat kimike të fosfinës, një gaz i dëmshëm që në Tokë lidhet vetëm me jetën, sipas studimit të botuar në revistën Nature Astronomy. Në Tokë, fosfina mund të formohet vetëm nga një proces industrial, te kafshët ose mikrobet.

Bashkë-autorja e studimit, Sara Seager, një shkencëtare planetare e Massachusetts Institute of Technology, tha se studiuesit “kaluan çdo mundësi dhe i përjashtuan të gjitha: vullkanet, goditjet e rrufeve, meteorët e vegjël që bien në atmosferë”. "Asnjë proces i vetëm që kemi parë nuk mund të prodhojë fosfinë në sasi mjaft të larta për të shpjeguar gjetjet e ekipit tonë,” shtoi ajo.

Autorët e studimit shkruan se shkaku mund të jetë fotokimi (efektet kimike të dritës), gjeokimi e panjohur (shkenca që përdor mjetet dhe parimet e kimisë për të shpjeguar mekanizmat prapa sistemeve gjeologjike), ose shenja jete.

Disa ekspertë pajtohen se gjetja është emocionuese, por thanë se nuk do të thotë se ka prova të mjaftueshme për të vërtetuar se ka jetë në një tjetër planet. Afërdita ka temperaturë 425 gradë Celcius dhe nuk ka ujë. “Afërdita është ferr. Afërdita është një lloj binjaku i keq i Tokës ”, tha David Clements, një tjetër autor i studimit.

Disa shkencëtarë jo të përfshirë në studim thanë për Associated Press se ishin dyshues, por të ngazëllyer për gjetjen.

NASA nuk ka dërguar asnjë ekip kërkimor në Afërditë që nga viti 1989, megjithëse Rusia, Europa dhe Japonia kanë dërguar sonda, pajisje të posaçme për qëllime studimi. Agjencia Evropiane e Hapësirës dërgoi një anije kozmike për të studiuar Afërditën në 2005, misioni i të cilës përfundoi në vitin 2014.

Burimi: Euronews, Associated Press

MOS I HUMBISNI