I ftuar në Syri Tv, Pëllumb Pipero bëri një përshkrim të përmbledhur rreth situatës së Covid-19 deri më tani në vendin tonë. I pyetur nëse virusi është dobësuar ose jo, epidemiologu tha se nuk mund të pohojë diçka të tillë. Pavarësisht se sipas tij, situata është po aq delikate për shkak të agresivitetit të njëjtë, fundi i virusit mund të jetë afër.
“Nuk e themi dot që virusi është dobësuar. Kjo duhet matur. Klinikisht nuk shoh ndonjë ndryshim. Nuk kam kurajo profesionale ta them këtë. Por për rastit të ekspozimit të shtuar, moshat e infektuara janë më të vogla. Agresiviteti i sëmundjes nuk është pakësuar."- u shpreh Pipero.
Ndër të tjera, mjeku tha se e vetmja armë që kemi ende në dorë për ta parandaluar dhe mundur janë masat dhe kujdesi që duhet të tregojmë.
"Dua të këshilloj edhe kolegët e mi që të mos pyesin dhe të mos merren nëse është agresiv apo jo virusi, pësoi apo nuk pësoi mutacion, por të edukojnë veten për t’u mbrojtur maksimalisht. Është detyrë primare që të mbrohemi dhe të tregojmë kujdes maksimal."- vazhdoi ai, duke thënë se brenda 1 viti ose 1 viti e gjysmë bota do të çlirohet nga kjo pandemi.
“Në hemisferën jugore gjatë dimrit, qarkullimi i viruseve stinore ka qenë shumë i ulët. Siç duket, masat e marra për koronavirusin parandalojnë edhe gripin stinor. Shpresoj që edhe te ne, qarkullimi i viruseve do mbetet i ulët. Grupet e rrezikuara duhet të vaksinohen me përparësi."
