Rreth dy muaj më parë, historia e familjes Josifi tronditi vendin, ku nënë e bijë u gjetën pa jetë në banesën e tyre, ndërsa Blerta, vajza e madhe, ndonëse në gjendje të rëndë ia doli të shpëtojë.

Pak javë më parë, Blerta Josifi ka lënë spitalin për t'u rikthyer në shtëpi dhe aktualisht për të po kujdeset xhaxhai dhe familja e tij. I ftuar në emisionin "Me zemër të hapur", xhaxhai i vajzave ka folur për gjendjen e Blertës e cila është ende e traumatizuar nga tragjedia. 

"Jam ende i shqetësuar për Blertën pasi ajo nuk është në gjendje të jetojë apo të ushqehet vetëm. Pasi doli nga spitali ne jemi kujdesur dhe po kujdesemi shumë për të, pasi ajo është e paqëndrueshme ende në logjikë. Ka momente që e pyes për diçka që ka të bëjë me ngjarjen dhe ajo në fillim thotë diçka tjetër dhe në fund thotë diçka tjetër. Nuk mund ti besoj asgjëje apo ta marrë definitive, pasi ajo i mohon dhe i pohon gjërat që ne e pyesim."

Në lidhje me ngjarjen, xhaxhai rrëfeu detajet e reja që Blerta ka dhënë pas daljes nga spitali.

"Nga sa më ka shprehur Blerta si fillim këtë vetëflijim e kanë nisur Zhaneta dhe Blerta të cilat nuk ja dolën dot dhe dolën nga dhoma, pastaj këtë insiativë e mori e ndjera Anisa e cila ndërroi jetë 15-muaj më parë sipas mjekësisë ligjore. Zhaneta shkonte në punë tre muaj para se të ndërronte jetë dhe kthehej me gëzim në shtëpi pasi mendonte se do të gjente Anisën të ringjallur. Blerta shprehet dhe është e bindur se mami dhe motra janë në gjirin e zotit, ajo pohon se do ta ndjekë këtë fe, por që nuk do bëjë një veprim të tillë vetëflijimi për ringjallje. Unë nuk dua shumë që t'i rikthej kujtesën se edhe sipas porosive të mjekut, nuk duhet ti rikujtojmë asgjë.

Në fillim Blertës i shfaqeshin pamje dhe bërtiste ndërsa tani është pak më qetë. Pasi doli nga spitali ne i kemi qendruar mbi kokë dhe nuk kemi neglizhuar për asnjë moment atë çka mjekët na pohuan pasi ajo përkeqësohet nga momenti në moment. Unë dhe familja e dajës së saj kemi marrë kujdestarinë e saj dhe po e mbajmë me radhë, tani ajo ndodhet te shtëpia e dajës, nuk e lejojmë asnjë moment vetëm, kur duhet të lëvizi dikush shkon dikush nga ne që qëndron me të.

Ne flasim, bisedojmë me të për të mësuar dhe parë se çfarë po ndodhë brenda mendjes së Blertës pasi unë jam shumë i shqetësuar, ajo duket sikur here-herë e ka logjikën tamam por here-herë duket e shqetësuar dhe nuk pohon më ato që mund t’i ketë thënë në fillim."- përfundon ai.

Burimi: Balkan Web