Në zgjedhjen e Kamala Harris si zëvendësen e tij, kandidati demokrat për president të Shteteve të Bashkuara të Amerikës, Joe Biden, tregoi se është në gjendje të “lexojë” mirë politikën amerikane. Në vazhdën e lëvizjeve të fuqishme si #MeToo dhe #BlackLivesMatter, zgjedhja e Kamala-s ishte jo vetëm një zgjedhje e sigurt, por edhe moment historik që u pasi një përkulje e harkut të historisë drejt drejtësisë.

Nëse Joe Biden shpallet fitues, Kamala Harris do të jetë zëvendëspresidentja e parë aziatiko-amerikane në SHBA, zëvendëspresidentja e parë me ngjyrë dhe zëndendëspresidentja e parë grua. Sigurisht që emri i saj nuk do t’i kthejë josimpatizantët e Biden në votues pro tij, megjithatë mund të sinjalizojë njerëzit me ngjyrë që të votojnë për të.

Kamala, me profesion avokate, është anëtare e Partisë Demokratike dhe gruaja e dytë afro-amerikane dhe e para indiano-amerikane që shërben në Senatin e Shteteve të Bashkuara..

Harris, 56 vjeç, lindi në Oakland, Kaliforni. Nëna e sij, Shyamala Gopalan, ishte shkencëtare e kancerit të gjirit e cila emigroi nga Tamil Nadu, Indi në 1960 për të ndjekur një doktoraturë në endokrinologji në Universitetin e Kalifornisë, Berkeley. I ati i saj, Donald J. Harris, ishte një profesor i njohur i ekonomisë në Universitetin Stanford, i cili emigroi nga Xhamajka në vitin 1961 për studime pasuniversitare për ekonomi në Bekerley. Të dy prindërit e saj ishin aktivistë për të drejtat e njeriut dhe në marshimet për të drejtat civile në vitet 1960, i merrnin edhe vajzat me vete. E motra e saj, Maya Harris, është ndihmësja e saj. Maya është avokate, aktiviste e të drejtave të njeriut dhe ka punuar në 2016-n në fushatën e Hillary Clinton.

Kamala dhe Maya Harris

Së fundmi, Kamala nisi një legjislacion në mbështetje të edukimit për fibromat e mitrës, që synon të forcojë më tej këto çështje (tumoret jokanceroze që rriten dhe zhvillohen në mitër). Kamala mbështeti gjithashtu Marrëveshjen e Re të Gjelbër, të propozuar nga Alexandria Ocasio-Cortez dhe Edward J. Markey, një rezolutë që paraqet një plan të Shteteve të Bashkuara për kontributin në lidhje me ndryshimet klimatike.

Harris prej kohësh ka kritikuar politikat e Donald Trump, si për shembull ndërtimi i murit në kufi me Meksikën. Ajo reagoi ashpër kundër vendimit për t’i dhënë fund programit të Obama-s që mbron fëmijët e emigrantëve të paligjshëm. Harris ndër të tjera është mbështetëse historike e LGBTQ+, madje është e para që zyrtarizoi martesat ligjore brenda të njëjtit seks në Kaliforni. Barack Obama u shpreh se “Kamala është shumë më tepër se e përgatitur për të qenë zëvendëspresidente”.

Kamala ka botuar dy libra. Në “The Truths We Hold” tregon kujtimet e fëmijërisë dhe hapat e parë në karrierën e saj në Kaliforni, ndërsa në librin e dytë, “Superheroes Are Everywhere”, paraqet fotografi për fëmijë përmes të cilave synon që të motivojë brezin e ri që të gjejë mënyra për ta bërë botën një vend më të mirë.

Kamala është e martuar që prej vitit 2014 me avokatin Douglas Emhoff.

Burimet: The Guardian, Politico, The Oprah Magazine