Qeveria e Libanit, ashtu siç CNN raportoi, dha dorëheqjen këtë të hënë (10 gusht), më pak se një javë pas shpërthimit masiv në Bejrut që shkaktoi më shumë se 160 të vrarë dhe ndezi protesta të dhunshme. Kryeministri Hassan Diab iu drejtua kombit duke njoftuar dorëheqjen e tij dhe të qeverisë pas shpërthimit, të cilin e quajti një “katastrofë përtej masës”.
Në fjalimin e tij, Diab kritikoi elitën në pushtet për nxitjen e “aparatit të korrupsionit më të madh se vetë shteti”. “Ne kemi luftuar me guxim dhe dinjitet,” tha ai duke iu referuar anëtarëve të kabineti. “Mes nesh dhe ndryshimit është një barrierë e madhe". Diab krahasoi shpërthimin e të martës me një “tërmet që goditi vendin” duke bërë që qeveria të hiqte dorë. “Ne kemi vendosur të qëndrojmë me njerëzit,” tha ai.
Hassan Diab, i vetëquajtur reformator, erdhi në pushtet dhjetorin e kaluar, dy muaj pas një kryengritjeje popullore që rrëzoi qeverinë e mëparshme. Qeveria e tij mbështetej nga parti të mëdha politike, duke përfshirë edhe grupin politik dhe militant të Iranit, Hezbollah. Tre ministra të kabinetit u larguan më parë, së bashku me shtatë anëtarë të parlamentit.
Ndërkohë Sekretari i Përgjithshëm i Kombeve të Bashkuara, Antonio Guterres, bëri thirrje për një hetim "të besueshëm dhe transparent" për shpërthimin. Presidenti francez Emmanuel Macron organizoi një konferencë të donatorëve ndërkombëtarë të dielën. Donald Trump dhe 15 udhëheqës të tjerë ishin të pranishëm dhe premtuan afro 300 milionë dollarë ndihmë për Libanin.
Monedha e Libanit ka humbur 70% të vlerës së saj që prej fillimit të protestave qeveritare në tetor. Varfëria është rritur dhe Banka Botërore parashikon që më shumë se gjysma e popullsisë së vendit do të varfërohet gjatë vitit 2020.
Burimi: CNN
