Pas shpërthimit që vrau më shumë se 160 njerëz dhe shkaktoi protesta të dhunshme, qeveria e Libanit pritet që ditën e sotme të japë dorëheqjen, sipas dy burimeve të CNN. Një burim i lartë në një nga ministrisë e Libanit tha për CNN se beson se qeveria do të japë dorëheqjen deri të hënën në mbrëmje. Tre ministra të kabinetit janë larguar tashmë, së bashku me shtatë anëtarë të parlamentit.
Libani për momentin po kalon krizën më të keqe ekonomike ndër dekada, shoqëruar edhe me rritjen e numrit të të infektuarve me koronavirus. Shpërthimi i të martës, i cili shkatërroi një pjesë të mirë të kryeqytetit dhe dëmtoi një pjesë tjetër, deri tani thuhet se erdhi si pasojë e mbajtjes së nitratit të amonit, eksploziv i fuqishëm, në kushte të pasigurta.
Kryeminitri Hassan Diab, i vetëquajtur reformator, erdhi në pushtet dhjetorin e kaluar, dy muaj pas një kryengritjeje popullore që rrëzoi qeverinë e mëparshme. Qeveria e tij mbështetet nga parti të mëdha politike, duke përfshirë edhe grupin politik dhe militant të Iranit, Hezbollah.
Tani, vendit i duhet të gjejë një kryeministër të tretë në më pak se një vit për të luftuar krizën dhe për të rimëkëmbur vendin. Monedha e Libanit ka humbur 70% të vlerës së saj që prej fillimit të protestave qeveritare në tetor. Varfëria është rritur dhe Banka Botërore parashikon që më shumë se gjysma e popullsisë së vendit do të varfërohet gjatë vitit 2020.
Qeveria u konsiderua e pafuqishme përballë një krize financiare në rritje. Shteti ende nuk ka miratuar një ligj për kontrollin e kapitalit, duke përkeqësuar situatën. Raportohet gjithashtu se miliarda dollarë amerikanë janë tërhequr nga Libani nga elita ekonomike e vendit.
Protestat gjatë fundjavës ishin të dhunshme. Qytetarët e zemëruar “pushtuan” disa ministri dhe gjuajtën me gurë dhe copa qelqi forcat e sigurisë. Policia nga ana tjetër u përgjigj me gaz lotsjellës, plumba prej gome dhe në disa raste, edhe zjarr.
Burimi: CNN
