Në jetën dhe karrierën e tij, pas shkëputjes nga televizioni, Ermal Mamaqi ka nisur një kapitull të ri, i cili nuk ka lidhje as me filmat. Në Instagram, Mamaqi postoi një seri fotosh nga realizimi i një trajtimi të moderuar prej tij.
“Kapitull i ri në jetën time. ‘Trainer. Spiker. Motivimi. 25 korrik 2020,” shkruan ai. “I jam mirënjohës ekipit tim dhe të gjithë atyre që u bënë pjesë e trajtimit të parë për vetëpërmirësimin dhe qëndruan për 2 ditë, 12 orë rresht për të marrë dozën e duhur që do t’i çojë në sukses.”
View this post on Instagram
Në vijim të mbishkrimit, Mamaqi falenderon trajnerët që e kanë përgatitur gjatë këtyre viteve: sipërmarrësin shqiptar Vasil Naçin, Brian Tracy, Tony Robbins, Avinash Ananda, Robert Kiyosaki dhe John Lee.
Në janar të këtij viti, Mamaqi foli për herë të parë për planet për t’u bërë trajner (guru për jetën, suksesin, biznesin) që përmes leksioneve tenton të lehtësojë dhe udhëzojë rrugën e dikujt drejt suksesit në një fushë të caktuar. I ftuar në “ThumbOn”, Mamaqi foli për rrugëtimin nga i varfër në i suksesshëm. Ai theksoi se biznesmenët shihen shtrembër në Shqipëri ngaqë jemi një vend post-komunist. "Të varfërit nuk janë të varfër ngaqë janë të pasurit të pasur,” tha ai. “Që të pasurohen duhet në radhë të parë, të ndryshojnë mendimin dhe të gjejnë mënyrën si të bëhen të pasur.”
Duket se producenti i është përkushtuar seriozisht këtij kapitulli të ri për sa kohë nuk ka as në plan të rikthehet në televizion. Në janar, në një intervistë për "Soirée", u shpreh se “pati një konsum të jashtëzakonshëm të personazhit” të tij në ekran.
“Tani shpejt jo, [nuk e mendoj rikthimin në televizion]. Kam qenë në një periudhë shumë të vështirë për të zgjedhur, moment i rëndësishëm që mora vendimin. Por kur ktheva kokën pas, pashë që kisha bërë 6 vite emisione duke përfshirë këtu edhe Digitalbin, edhe kisha realizuar 248 emisione, ‘6 ditë pa Ermalin’ dhe ‘Xing me Ermalin’. Ishte një konsum i jashtëzakonshëm i personazhit tim, por edhe e gjithçkaje çfarë ndodh atje,” tha ai.
Por të qenurit një guru për jetën nuk është diçka që ndodhi brenda natës. Ndonëse gjatë gjithë karrierës, figura e tij është përqëndruar te humori, prej nëntorit të vitit shkuar, Mamaqi postonte në Instagram citate frymëzuese nga Sheryl Sandberg apo Tolstoi. Shtojmë këtu edhe pjesëmarrjen e tij në trajnime të organizuara nga Tony Robbins, që duket se e përgatisnin për t’u bërë trajner. Në “ThumbOn” në janar, Mamaqi tha:
“Unë trajnohem për t’u bërë trajner. Nuk jam akoma në atë nivel që të dal dhe t’u them njerëzve që mund t’u tregoj rrugën drejt suksesit. Është një nga ëndrrat e mia. Besoj se do realizohet.”
Kapitulli i ri në karrierë me gjasë do të vazhdojë paralelisht me përkushtimin në kinematografi. “Hapi im i radhës do të jetë një film tjetër. Kam disa ide, disa histori. Jam akoma në kërkim të historisë më të mirë,” tha në janar në “Soirée”.
