Greta Thunberg u vlerësua me një çmim portugez me vlerë 1 milion euro për shkak të punës për të mbrojtur mbjedisin dhe për të ngritur zërin për rëndësinë e ndryshimit të klimës.

“Janë më shumë para sesa mund ta imagjinoj, por të gjitha paratë e fituara nga çmimet do t’u dhurohen, përmes fondacionit tim, organizatave dhe projekteve të ndryshme që punojnë në vijën e parë për të lehtësuar krizën e klimës,” tha e reja suedeze në një video të postuar në internet (via The Guardian).

Greta-s iu dha cmimi Gulbenkian me motivacion mënyrën se si “ka mundur të ndërgjegjësojë gjeneratat e reja për kauzën e ndryshimit të klimës”.

Nga çmimi i përgjithshëm, 100,000 euro do të dhurohen për fushatën Son Amazonia e udhëhequr nga Fridays For Future Brazil që po trajton shpërthimin e koronavirusit në Amazon. 100,000 euro të tjera do të shkojnë për fondacionin Stop Ecocide, që ka për qëllim të pakësojë aktivitetin kriminal njerëzor që shkel parimet e të drejtës mjedisore dhe dëmton rëndë ekosistemet.

Greta fitoi edhe çmimin më të lartë të të drejtave të njeriut nga Amnesty International dhe çmimin suedez Right Livelihood, që shpeshherë konsiderohet si një Nobel alternativ.

Greta Thunberg, aktiviste dhe kandidate për çmimin Nobel për Paqe, u shpall personazhi i vitit 2019 dhe një nga vajzat/gratë që la gjurmë në dekadën që lamë pas, duke u renditur në vendin e 100 në listën e Grave më të Fuqishme sipas Forbes për vitin 2019. Fjalimi i saj, i mbajtur në Samitin e Kombeve të Bashkuara në shtator të një viti më parë mbi ndryshimet klimatike, shokoi gjithë botën.